Быйыл «Спортивнай» түөлбэҕэ оҕо саада уонна спорткомплекс тутуллуохтара

Дьокуускайга «Спортивнай» түөлбэҕэ 240 миэстэлээх оҕо саадын уонна элбэх хайысхалаах спортивнай комплексы тутуу сыл бүтүөр диэри түмүктэниэҕэ. Саҥа эбийиэктэри тутууга хаарбах дьиэлэри көтүрдүлэр диэн ЯСИА иһитиннэрэр.

“Оҕо саада бу сыл бүтүүтэ тутуллан бүтүөҕэ. Тутуллар сиригэр үс хаарбах дьиэ көһөрүллүбүтэ. Элбэх хайысхалаах спортивнай комплекс тутуутун үлэтэ эмиэ тэтимнээхтик барар. Дьону көһөрүү соторутааҕыта түмүктэммитэ, онон тутааччылар үлэлэрин өрдөөҕүтэ саҕалаабатахтара эрээри, эбийиэги сыл бүтүөр диэри үлэҕэ киллэриэхпит диэн эрэннэрэллэр. Бу дьиэ чэпчэки  матырыйааллартан оҥоһуллар», — диэн  бырабыыталыстыба бэрэссэдээтэлэ Кирилл Бычков эттэ.

Дьокуускай 2-с, 17-с кыбаарталларыгар баар «Спортивнай» түөлбэни тутарга 160 хаарбах дьиэни көһөрүөххэ наада.  Былырыын икки этээстээх 11 дьиэ олохтоохторо көһөрүллүбүттэрэ.

2025 сыл бүтүүтэ Якутская, Космонавтар, Пионерскай уулуссаларга баар 2В блоктан өссө 17 дьиэни көһөрүөхтэрэ.  Олохтоохторго «Звезднай» түөлбэҕэ кыбартыыра эбэтэр сметнай сыанаҕа олоҕурбут төлөбүр бэриллиэҕэ, онон кинилэр бэйэлэрэ талан ылбыт ханнык баҕарар дьиэлэрин атыылаһар кыахтаныахтара.