Быйыл туос суруктар көстүөхтэрэ дуо?

Дьокуускай киинигэр, Каландарашвили уулуссатын уонна Марк Жирков быстах туора уулуссатын быһа охсуһууларыгар, Нефтеюганскай куораттан сылдьар Хотугу археология -1 НПО ХЭУо үлэһиттэрэ археологическай хаһыылары салҕаатылар.

Ааспыт сылга манна ыытыллыбыт хаһыылар сенсационнай арыйыыны аҕалбыттара – Уһук Илиҥҥэ өссө көстө илик 11 туос сурук фрагменнара көстүбүттэрэ. Билигин учуонайдар быйыл чинчийиэхтээх учаастактарын сөргүтэ сылдьаллар, ол кэннэ үлэҕэ түһүнүөхтээхтэр.

2024 сыллаахха көстүбүт туос суруктар билим эйгэтигэр улахан интэриэһи тарпыттара. Бу сезоҥҥа археологтар былырыыҥҥы хаһыыларын ыраастаан баран, мал арааһа көстөр араҥатын өссө дириҥэтэн чинчийэргэ бэлэмнэнэллэр. Ордук туос суруктар сорохторун уонна XVII–XIX үйэтээҕи олох-дьаһах маллара көстөллөрүгэр эрэнэллэр диэн Култуурунай нэһилиэстибэ эбийиэктэрин харыстыыр управление салайааччыта Николай Макаров бэйэтин тг-ханаалыгар иһитиннэрэр.