Быйылгы сайын сүрүн сабыытыйалара

Саха сиригэр икки улахан далааһыннаах тэрээһин буолаары турар: Олоҥхо ыһыаҕа уонна Манчаары оонньуулара.

СӨ Бырабыыталыстыбатын бэрэссэдээтэлин солбуйааччы Сергей Местников Олоҥхо ыһыаҕа саха норуотун сомоҕолуурун, Манчаары оонньуулара спортсменнар күүстэрин-кыахтарын көрдөрөр, төрүт үгэһи илдьэ сылдьар ураты бырааһынньыктара буоларын тоһоҕолоон бэлиэтээтэ.

-Нерюнгрига буолаары турар Олоҥхо ыһыаҕар бэлэмнэниини хайдах сыаналаатыҥ?

-Үлэ саҕаламмыта ыраатта, сүрүн болҕомтобутун 17 эбийиэги тутууга уурбуппут. Быйыл саха эрэ буолбакка, эбэҥки норуотун култууратын эмиэ көрдөрүөхпүт. Бырааһынньыкка 70-тан тахса тэрээһин буолара күүтүллэр: куонкурустар, ат сүүрдүүтэ, спортивнай күрэхтэһиилэр, сиэр-туом тэрээһиннэрэ, кэнсиэртэр, о.д.а. Олоҥхоһуттар, оһуохайдьыттар куонкурустара бэҕэһээ саҕаламмыта уонна үс күнү быһа салҕаныаҕа.

-Кыттааччылары, ыалдьыттары ханна түһэрдигит?

-Култуурунай, спортивнай бырагыраамаларга кыттар дьоҥҥо, тэрийээччилэргэ 2000-тан тахса миэстэни бэлэмнээтибит. Бу гостиницалар эрэ буолбатах, оскуолалар, уһуйааннар, интэринээттэр.

-Нерюнгри оройуонугар ыытыллар Ыһыахтан тугу кэтэһэҕин?

-Ыһыах биһиги төрүт култуурабытыгар атын норуоттар болҕомтолорун тардыа, ону таһынан биһиги эрэгийиэммитигэр олорор бары норуоттары түмүө. Хас биирдии ыһыахха кэлбит киһи бэйэтин бу сабыытыйа сорҕотунан ааҕыныан баҕарабыт.

Бырагыраамаҕа спорт традиционнай көрүҥнэригэр күрэхтэһиилэр, норуот оҥоһуктарыгар маастар-кылаастар, быыстапкалар бааллар. Оҕолорго анаан тыйаатырдар испэктээкиллэрин көрдөрүөхтэрэ. Сахалыы ыстаныыларга, о.д.а. көрүҥнэргэ күрэхтэһиилэр буолуохтара.

Ону таһынан Нерюнгри устуоруйатын уонна кэскилин ситимниир стратегическай сиэссийэлэр, төгүрүк остуоллар ыытыллыахтара. Төрдүс төгүлүн аан дойду сэттэ тылыгар “Олоҥхону” ааҕыы марафона буолуоҕа.

Олоҥхо ыһыаҕын бырааһынньыга от ыйын 5 күнүгэр түмүктэниэҕэ, кыайыылаахтары наҕараадалыахпыт, Ыһыах сиимбэлин Кэбээйи улууһугар туттарыахпыт.

Манчаары оонньуулара

-Кэлэр нэдиэлэҕэ Таатта улууһугар Манчаары оонньуулара саҕаланыахтара. Улуус ыалдьыттары көрсөргө бэлэм диэн иһиллибитэ.

-Түөрт сылы быһа тэринэн үлэлээтибит, ол түмүгэр улуус хас да саҥа эбийиэктэннэ – интэринээттээх лиссиэй, элбэх функциялаах комплекс, 1500 миэстэлээх ипподром, 1000 миэстэлээх стадион.

-Ол гынан баран сорох эбийиэктэр ситэ бүппэтилэр дии.

-Оннук, Чөркөөххө модульнай спортивнай сааланы ситэ бүтэрбэтибит. Бэдэрээтчит графигыттан хаалла, атырдьах ыйын бүтүүтэ бүтэриэҕэ.

-Оонньууларга төһө спортсмен кэлэрэ күүтүллэр?

-Билиҥҥи туругунан 1662 спортсмен регистрацияны ааста. 19 олордор, 13 аһатар эбийиэктэри бэлэмнээтибит, бары аккредитация аастылар.

Оонньууларга спортсменнары, култуурунай бырагыраама кыттыылаахтарын, судьуйалары, волонтердары киллэрэн туран сэттэ тыһыынча киһи кыттара күүтүллэр.

-Төһө култуурунай тэрээһин былааннанна?

-Өрөспүүбүлүкэ тэрилтэлэрин уонна улуус олохтоохторун күүһүнэн 67 тэрээһин ыытыллыаҕа.

-Спорт тиэрминнэрин сахалыы тылбаастыырга улахан үлэ барбытын билэбин.

-Билим институттара биһиэхэ тылбаастыырга көмөлөспүттэрэ. Кэлэр нэдиэлэҕэ сахалыы тылынан суруйар спортивнай суруналыыстарга сэминээр ыытыахпыт. Оонньуулар кэннилэриттэн тылдьыт таһаарыахпыт.

-Күрэхтэһиини быһа эпииринэн көрөр инибит.

-“Саха” НКИК барытын көрдөрүө. Ону таһынан быйыл аан бастаан “Матч ТВ” телеханаал хамаандата кэлиэҕэ, биһиги күрэхтэһиилэрбит туһунан биэриилэри бэлэмниэхтэрэ.

-Наҕараадалааһыҥҥа туох эмэ саҥаны киллэрдигит дуу?

-Уопсай хамаанданан кыайыылаахтарга “мүһэ” быһыылаах хорҕолдьунтан уонна сибиниэстэн уһаарыллыбыт эксклюзивнай куубак туттарыахпыт, ыйааһына 7-9 киилэ. Ону таһынан Таатта улууһун олохтоохторо кыайыылаахтарга анаан 116 мүһэни бэлэмнии сылдьаллар.

Абсолютнай кыайыылаахтарга 11 сардаҥалаах, таастаах ураты оҥоһуулаах мэтээллэр оҥоһулуннулар. Мэтээл ортотугар Баһылай Манчаары мөссүөнэ уонна Таатта улууһун дьаралыга баар.

Бары тэрээһиннэр үрдүк таһымҥа баралларыгар эрэнэбин, кыттааччылар да, көрөөччүлэр да улаханнык астыныахтара

Анастасия МОСКВИТИНА