Быйылгы ыһыахха тугу кэтэн «муодунай» буолабыт?

Бэс ыйын 21-22 күннэригэр Дьокуускайга Өксөкүлээх Өлөксөй аатынан Норуоттар доҕордоһууларын дьиэтигэр «Ыһыах муодата» диэн быыстапка-дьаарбаҥка тэрилиннэ. Быыстапка сарсыарда 10 чаастан киэһэ 20 чааска диэри үлэлиир.

«Олохтоох оҥорон таһаарааччылар, биллэр бреннэр оноһуктарын барытын биир сиргэ көрөн-сэргээн ылыахха сөп», – диэн тэрийээччилэр биллэрэллэр. Быыстапкаҕа маннык курдук биллэр маҕаһыыннар кыттыыны ылаллар: «Sakha.natur.obuv», «Sakhaboho», «Көмүлүөк», «SYRDUK_PRO» уо.д.а.

Дьаарбаҥкаҕа араас сахалыы оһуордаах, бэлиэлээх чороннор, көмүлүөктэр, туой оҥоһуктар, ону таһынан үрүҥ көмүс киэргэл арааһа, илин кэбиһэрдэр бааллар. Бу киэргэл 47 тыһыынча солкуобайтан саҕалаан атыыга баар эбит, бөҕөх – 7 тыһыынча солкуобай, ммой киэргэлэ – чэпчээбитэ 18 тыһыынча солкуобай, ыараабыта 34 тыһыынча солкуобай.

Ону таһынан, атах таҥастара атыыга бааллар. Тирииттэн оноһуллубут уһун сотолооох саппыкы – 10 тыһыынча солкуобай, кылгас сотолоох – 6,5 тыһыынча солкуобай. Искусственнай тирииттэн оноһуллубут саппыкы сыаната – 3 тыһыынча солкуобай.

Дьаарбаҥкаҕа бохо истииллээх халадаайдар 15 тыһыынча солкуобайтан саҕалаан 17 тыһыынча солкуобайга дриэри атыылана тураллар. Ону таһынан, атлаас матырыйаалтан тигиллибит халадаайдар, сарапааннар 6-8 тыһыынча солкуобайга атыыга бааллар.

Диана НОВГОРОДОВА.