Быйылгыттан эмп-томп испииһэгэ эбилиннэ

РФ Бырабыыталыстыбатын премьер-миниистирэ Михаил Мишустин   муус устар 16 күнүнээҕи дьаһалынан олоххо-дьаһахха наадалаах уонна ордук суолталаах препараттар  (ЖНВЛП) испииһэктэрэ саҥа эмтэринэн эбилиннэ.

Саҥардыллыбыт испииһэккэ араас вирус, бактыарыйа инфекциялаах уонна сыстыганнаах-сүһүрдэр ыарыы­лаах дьону эмтииргэ туһаныллар 3 препарат эбилиннэ. Ол – цефепим+сульбактам, ламивудин+фосфазид, тирозил-D-аланил-глицил-фенилаланил-лейцил-аргинина сукцинат.

Ону таһынан, испииһэккэ «рассеяннай склерозтаахтарга» наадалаах сампэгинтерферон бета-1а уонна  дивозилимаб диэн икки саҥа эмп киллэрилиннэ.

Бу эмтэр бары Арассыыйа сиригэр-уотугар оҥоһуллаллар. Сыанатын судаарыстыба бэрээдэктиир. Итинник препараттары нэһилиэнньэҕэ мэдиссиинэ көмөтүн босхо оҥорууга судаарыстыба мэктиэтин бырагырааматын чэрчитинэн  ыарыһахтары эмтииргэ туһаналлар.

Испииһэккэ төһө эмп баарый?

Олоххо-дьаһахха наада­лаах уонна ордук суолталаах препараттар испииһэктэригэр 800-тэн тахса эмп-томп киирэр.

Препараттары РФ Доруобуйа харыстабылын министиэристибэтэ кииннээн атыылаһар уонна ыарыһахтарга босхо бэриллэр.  Атыылаһыы ороскуотун федеральнай бүддьүөт үбүлүүр.

РФ бырабыыталыстыбата олоххо-дьаһахха наадалаах уонна ордук суолта­лаах препараттар испииһэктэрин дойдуга эмп-томп сыанатын бэрээдэктиир туһугар бигэргэтэр. Сыананы судаарыс­тыба бэрээдэктээһинин сыалынан-соругунан эмтээх препараттар нэһилиэнньэҕэ уонна эмтиир, ыарыыны сэрэтэр тэрилтэлэргэ табыгастаах буолалларын ситиһии буолар.

Олоххо-дьаһахха наадалаах уонна ордук суолталаах препараттар испииһэктэрэ 2012 сылтан баар. Испииһэк бүтэһигин 2022 сылга эбиллэн, 808 эмп-томп киллэриллибитэ.

Альбина Васильева, куорат олохтооҕо:

– Итинник эмтэр испииһэктэрин элбэтэн иһэллэрэ үчүгэй. Ол гынан баран, холобур, босхо ылыахтаах эмтэриҥ эмтиэкэлэргэ мэлдьи баар буолбаттар. Сороҕор күүттэриилээх буолар. Киирбит эмтиэкэҥ аайыттан булан ылбаккын.

Куоракка көһөн кэлбитим аҕыйах сыл буолла. Онон, манна ити кыһалҕаны балачча көрүстүм. Арай куорат 1 №-дээх поликлиникатыгар босхо эмкэ ырысыабы суруйалларын уонна онно баар эмтиэкэттэн тута ылалларын билэбин.

Хата, улууска олорор эрдэхпинэ, арыый судургу этэ. Чэпчэтиинэн туһанааччылары Арассыыйа, эрэгийиэннээҕи диэн араҥаларга араараллар. Улууска олордохпуна өссө улуус­тааҕы чэпчэтиинэн туһанааччыларга киирсэр этим. Ол эбэтэр, улуус бэйэтин көрүүтүнэн атын эмтэргэ чэпчэтиини оҥорор этэ.

Ити эн эппит эмтэриҥ үгүс киһиэхэ наада бөҕө буоллахтара. Онон, үөрэбит эрэ. Ол эрэн, испииһэккэ тоҕо олох аҕыйах эми эбэллэрин кыайан  өйдөөбөппүн…

Эминэн хааччыллыыга эбии үбүлээһин көрүлүннэ

С гепатиттаах ыарыһахтары эминэн хааччыйыыны РФ Бырабыыталыстыбата үбүлүүр буолла. РФ бэрэсидьиэнэ Владимир Путин сорудаҕынан кэлэр үс сылга С вирус­таах гепатитынан ыалдьар дьоҥҥо эми атыылаһыыга эбии 4,5 миллиард солк. сыл аайы көрүллүөҕэ. Бу үп эрэгийиэннэргэ түҥэтиллиэҕэ. Федеральнай үбүлээһин көмөтүнэн диспансернай кэтээн көрүүгэ сылдьар дьон амбулаторияҕа эмтэ­нэллэригэр анаан атыылаһыахтара. Ол түмүгэр, Арассыыйаҕа итинник эмтэринэн 75,8 тыһыынчаттан тахса ыарыһах хааччыллыаҕа.

Маннык быһаарыы ыарыһахтары эминэн хааччыйыы туруктаах буоларын туһугар ылыллар. Федеральнай үбүлээһин көмөтүнэн олоххо-дьаһахха наадалаах уонна ордук суол­талаах препараттар испии­һэктэригэр киллэриллибит вируһу утары охсуһар эмтэри  (велпатасвир+софосбувир, глекапревир+пибрентасвир, гразопревир+элбасвир, даклатасвир уонна  софосбувир) атыылаһыахтара. Михаил Мишустин ону таһынан ыарахан уонна сэдэх ыарыылаах дьону эмтииргэ эрэгийиэннэргэ препараттары тириэр­диигэ 360 мөлүйүөнтэн тахса солк. тыырар туһунан дьаһалы таһаарда. Бу наадалаах эми суһаллык тириэрдиини хааччыйыаҕа. Үөһээ этиллибит эмтэр бары эрэгийиэннээҕи эм­­тиэкэлэргэ тириэрдиллэллэр уонна эмтиир быраас ырысыабынан ыарыһахха босхо бэриллэллэр.

Ыйыт-хоруйдуубут

– Олоххо-дьаһахха наадалаах уонна ордук суолталаах препараттар диэн тугуй?

– Эмтээх сириэстибэлэргэ судаарыстыба сыананы бэрээдэктиирин туһугар РФ бырабыыталыстыбата бигэргэтэр эмтээх препараттарын испииһэгэ.

– Ити эмтэри хайдах ылылларый?

– Олоххо-дьаһахха наадалаах уонна ордук суолталаах препараттар испииһэктэригэр киирэр эмтэргэ босхо  ырысыабы ылаҕын. Онуоха:

•  Учаастактааҕы терапевка баран, докумуоннаргын туттараҕын;
• Быраастан № 148-1у-06 (л) көрүҥүнэн суруллубут ырысыабы ылаҕын;
• Анаммыт эмтэри быраас барытын мэдиссиинэ каартатыгар суруйбутун-суруйбатаҕын чопчулуугун.

– Эми босхо кимнээх ылар быраап­таахтарый?

– Доруобуйаларынан хааччахтаах дьон;

– Байыаннай дьайыылар бэтэрээннэрэ;

– Аҕа дойду Улуу сэриитин кыттыылаахтара;

– Саахал уонна ядернай боруобалааһыннар радиацияларыттан эмсэҕэлээбиттэр;

– ССРС уонна Арассыыйа Дьоруойдара;

– Социалистическай Үлэ Дьоруойдара;

– «Албан аат» уонна «Үлэҕэ албан аат» уордьаннар кавалердара.

– Наадыйар эмиҥ испииһэккэ киирбитин-киирбэтэҕин хайдах би­­лиэххэ?

– Наадалаах препараккын талан баран, кини регистрацияламмыт дастабырыанньатын көрөҕүн. Онно аллараа өттүгэр испииһэккэ киирбитин эбэтэр киирбэтэҕин туһунан бэлиэ баар.