Быйылгыттан гостиницалар кылаастарынан наарданаллар  

2025 сыл тохсунньу 1 күнүттэн дьон түһэр сирдэригэр саҥа ирдэбил киирбитэ.

Ол курдук, бары гостиницалар, хостеллар, санаторийдар, сынньалаҥ кииннэрэ, оҕо доруобуйатын чэбдигирдэр лааҕырдар, ыалдьыттар хосторо уо.д.а. дьон түһэн олорор сирдэрэ анал реестрга киирэллэрэ  уонна кылаастарынан наарданаллара ирдэнэр. Өскө биир эмэ урбаанньыт бу анал испииһэккэ киирэ илик тэрилтэлээх буоллаҕына, тустаах докумуону толорорго тиэтэйэрэ наада. Дьон түһэр дьиэлэрэ анал ирдэбил быһыытынан кылаастарга араарыллыбатах буоллахтарына, кинилэр үлэлэрэ 2025 сыл балаҕан ыйын 1 күнүттэн тохтотуллар.

Дьон түһэн олорор сирдэригэр сыһыаннаах анал ирдэбил Балаһыанньата бигэргэммитэ. Онно олоҕуран, тэрилтэлэр төһө хааччыллыылаахтарынан бары кылаастарынан наардааһыны ааһаллар (классификация). Онон маннык биисинэһинэн дьарыктанар дьон бу иһитиннэриини болҕомтоҕо ылан, тустаах докумуоннары кэмигэр толороллоро наада.