«Былааһы кытта кэпсэтии» биэриигэ халаан уутуттан эмсэҕэлээбиттэргэ көмө оҥоруу дьаһалларын кэпсиэхтэрэ

Ахсынньы 13 күнүгэр күнүс 13 чаас 05 мүнүүтэҕэ «Былааһы кытта кэпсэтии» «Тэтим» НКИХ «Саха» FM 107,1 араадьыйанан биэриигэ СӨ Тутууга миниистирин солбуйааччы Александр Баланов уонна СӨ Айылҕа харыстабылыгар уонна ойуур хаһаайыстыбатын миниистирин солбуйааччы Анатолий Алексеев кыттыыны ылыахтара.

Араадьыйанан истээччилэргэ халаан содулугар эмсэҕэлээбит нэһилиэнньэҕэ социальнай өйөбүллэр дьаһалларын туһунан кэпсиэхтэрэ. Сааскы халаан уутун содулларын туоратыыга үлэ ыытыллыбытын туһунан  иһитиннэрии бэриллиэҕэ. Эпиир кыттыылаахтара дьиэлэрэ эмсэҕэлээбит эбэтэр сүтэрбит дьоҥҥо социальнай өйөбүлгэ туох дьаһаллар көрүллэрин быһаарыахтара. Саҥа дьиэни тутуу, хапытаалынай өрөмүөнү ыытыы быраабылаларын кэпсиэхтэрэ.

Бу уонна да атын ыйытктарга хоруйдуохтара. Араадьыйаны истээччилэр «Былааһы кытта кэпсэтии» биэрии кэмигэр эпииргэ эрийэн ыйытыахтарын сөп: 8 (4112) 32-00-66 уонна 32-11-66.