Былаас бэрэстэбиитэллэригэр күүһүнэн өттөйбүт дьон сууттанна
11.04.2025, 19:30
Хаартыска: Саха сиринээҕи Силиэстийэлиир кэмитиэтин пресс-сулууспата
Бөлөххө киир:
Томпо оройуонугар икки киһини былаас бэрэстэбиитэллэригэр күүһүнэн өттөйүүгэ буруйдааҕынан аахтылар. Силиэстийэ быһаарбытынан, 2023 сыл сайыныгар кинилэр «Тукулаан» судаарыстыбаннай айылҕа харыстанар сиригэр көҥүлэ суох киирэн, арыгылаан баран, буруйу оҥорбуттар.
РФ Силиэстийэлиир кэмитиэтин Саха сиринээҕи силиэстийэлиир управлениетын пресс-сулууспата иһитиннэрбитинэн, Томпотооҕу судаарыстыбаннай экологическай хонтуруол инспекциятын салайааччы уонна айылҕа харыстабылын инспектора бу харыстанар сиртэн баралларын модьуйбуттар. Ол эрээри, 1981 уонна 1987 сыл төрүөх, арыгы испит эр дьон мордьооттоһон, охсуһан турбуттар.
Кэлин силиэстийэ кэмигэр бу дьон охсуспуттарын, күүстэринэн өттөйбүттэрин төһө да мэлдьэһэ сатааталлар, силиэстийэҕэ кинилэр буруйдарын дакаастыыр сибидиэнньэ хомуллубут. РФ Холуобунай кодексын 318 ыстатыйатын 1 чааһынан (былаас бэрэстэбиитэллэригэр күүһүнэн өттөйүү) буруйдааҕынан билиниллибиттэр.
Суут кинилэри 3 сыл усулуобунай болдьоххо көҥүллэрин быһарга уурда.
Сообщить об опечатке
Текст, который будет отправлен нашим редакторам: