Былатыан Ойуунускай аатынан судаарыстыбаннас түмэлигэр 9400 биридимиэт хараллан сытар

Бүгүн, муус устар 27 күнэ – Өрөспүүбүлүкэбит күнэ. Манан сибээстээн, Сахабыт сирин судаарыстыбаннаһын түмэллэрин туһунан сырдатабыт.

Бы­ла­тыан Ойуу­нус­кай ааты­нан су­даа­рыс­ты­бан­нас тү­мэ­лин сэбиэдиссэйэ Михаил  Аржаков:

-Саха тыллаах барыта билэр, ытыктыыр, ХХ үйэ чулуу киһитэ Былатыан Алексеевич Ойуунускай төрөөбүт түөлбэтигэр 2012 сыл муус устар 27 күнүгэр кини аатынан Судаарыстыбаннас түмэлин дьиэтин бастакы акылаата түспүтэ.

Б. Ойуунускай аатынан Судаарыстыбаннас түмэлин сэбиэдиссэйэ Михаил Аржаков: «Акылааты түһэрии сиэригэр-туомугар СӨ бэрэсидьиэнэ Егор Борисов уонна Саха Өрөспүүбүлүкэтин бастакы бэрэсидьиэнэ Михаил Николаев кыттыыны ылбыттара. Кинилэр ытык киһи аатын үйэтитэр дьоһуннаах түмэл үлэтэ-хамнаһа таһаарыылаах буоларыгар баҕа санааларын, кэс тылларын эппиттэрэ.

Биһиги түмэлбит тутуутун, үлэҕэ киириитин устуоруйата, 2011 сыл сэтинньи 18 күнүгэр Былатыан Ойуунускай төрөөбүтэ 120 сыллаах үбүлүөйдээх сылын чэрчитинэн, оччотооҕу СӨ бэрэсидьиэнэ Егор Борисов 843‑с нүөмэрдээх дьаһалыгар олоҕуран саҕаламмыта. Биир сыл иһигэр тутан-таҥан, 2012 сыл ахсынньы 25 күнүгэр Былатыан Ойуунускай аатынан Судаарыстыбаннас түмэлэ Емельян Ярославскай аатынан Хотугу дойду норуоттарын култуураларын уонна устуоруйаларын холбоһуктаах судаарыстыбаннай түмэлин салаатын быһыытынан аһыллан үлэҕэ киирбитэ.

Икки мэндиэмэннээх, киэҥ-куоҥ экспозиционнай саалалардаах, Былатыан Ойуунускай төрөөбүт балаҕанын куоппуйата, саха бабаарынатын санатар аныгы матырыйаал көмөтүнэн оҥоһуллубут

аһыыр сирдээх, бибилэтиэкэ, эспэнээттэри уурар-харайар анал пуонда хосторо бааллар.

Манна Былатыан Ойуунускай төрөөбүт кэмиттэн саҕалаан, кини Саха сиригэр биллэр-көстөр үлэһит буолуутун, эдэр өрөспүүбүлүкэ бастакы салайааччытын, уоттаах-күөстээх трибуну, саҥа кыыһар олох сардаҥатыгар сирдээччини, учуонай-лингвиһи, дьиэ кэргэнин уо. д.а. бары өттүнэн ыалдьыттарга көрдөрөр-кэпсиир сүрүн экспозициялар тураллар. Маны таһынан, Саха сирин судаарыстыбаннаһын төрүтэ, символиката, судаарыстыбаннай былаас, салайааччылар истиэндэлэрэ көрдөрүллэллэр. Бу экспозицияларга олоҕуран, түмэл уопсастыба олоҕор-дьаһаҕар, кэнчээри ыччакка туһаайыллар патриотическай уонна историческай-култуурунай иитиигэ тус сыаллаах үлэни сүрүннээн ыытар.

Билигин пуондабытыгар 9400 биридимиэт хараллан сытар. Олор истэригэр: сүрүн пуонда — 1027 устуука, научнай-көмө — 8400, саппаас пуонда — 75, бибилэтиэкэбитигэр — 1200 кинигэ.

Үөрэтэр-сырдатар үлэҕэ уонна түмэл педагогикатыгар Былатыан Ойуунускай аатынан Чөркөөх орто оскуолатын уонна сылы эргиччи үлэлиир «Сардаана» лааҕыры кытта биир ситимнээхтик үлэлиибит. Манна даҕатын бэлиэтээтэххэ, быйыл төрдүс сылбытын «Они стояли у истоков государственности”, “Саха саргытын түстээччилэр” диэн бырайыакка кыттыһан, үүнэр көлүөнэҕэ Саха сирин автономиятын олохтообут П. А. Ойуунускай, М. К. Аммосов, И. Н. Барахов ааттарынан оскуолалары, түмэллэри кытта биир ситимнээхтик үлэлиибит. Түмэл уруоктара уонна лиэксийэлэр кэмиттэн кэмигэр былаан быһыытынан ыытыллаллар. Научнай-чинчийэр үлэҕэ СӨ Билимин академиятын, СӨ Национальнай архыыбын, СӨ Гуманитарнай чинчийии институтун, СӨ Национальнай бибилэтиэкэтин уо. д.а. кытары бииргэ алтыһабыт.

2026 сылтан түмэлбитигэр икки түһүмэхтээх улахан өрөмүөн саҕаланыаҕа. Онон бары өттүнэн Судаарыстыбаннас түмэлигэр улахан саҥардыы үлэтэ күүтүллэр.