Былатыан Ойуунускай тэрийбит института үбүлүөйдээх сылын Тааттаттан саҕалаата

Быйыл саха сэбиэскэй литературатын төрүттээччи, учуонай-лингвист П.А. Ойуунускай 1935 сыллаахха тэрийбит Тыл уонна култуура института төрүттэммитэ 90 сылын туолла.

Былатыан Ойуунускай тэрийбит института бу сыллар тухары Аал-Луук мастыы чэчирээн, ханнык да кэм тургутууларын туораан, норуотун туһугар үлэлии-хамсыы турар.

Бүгүн Гуманитарнай чинчийии уонна аҕыйах ахсааннаах хотугу омуктар кыһалҕаларын института үбүлүөйдээх Күннэрин Таатта улууһуттан саҕалыыр санаалаах үктэннилэр. Бастаан поэт төрөөбүт алааһыгар, оттон Тохтобулга Ойуун монуменыгар сырыттылар, ол кэннэ П.А.Ойуунускай аатынан судаарыстыбаннас түмэлигэр кэллилэр.Үөрүүлээх тэрээһиҥҥэ Гуманитарнай чинчийии уонна аҕыйах ахсааннаах хотугу омуктар кыһалҕаларын институтун дириэктэрэ Сардаана Боякова, Таатта улууһун Октябрьскай нэһилиэк баһылыгын солбуйааччы Октябрина Вырдылина, СӨ судаарыстыбаннаһын түмэлин сэбиэдиссэйэ Михаил Аржаков, Чөркөөхтөөҕү политсыылка түмэлин сэбиэдиссэйэ Михаил Протодьяконов тыл эттилэр.

Былатыан Ойуунускай саҕалаабыт үлэтин өссө чиҥэтэн, байытан, хардарыта көмөлөһөн биир ситимнээхтик үлэлииргэ үс өрүттээх сөбүлэһии түһэрсилиннэ.