Былатыан төрөөбүт балаҕана оттуллан, ыалдьыттары үөрэ көрүстэ

Бүгүн Ойуунускай төрөөбүт сиригэр Муҥха Дэлбэрийбит алааска биир дойдулаахтара, оскуола оҕолоро кыттыылаах сүгүрүйүү миитинэ буолла. Анаабыт курдук үтүө күн туран, иһийэн турбут алаас оҕо саҥатынан биирдэ чугдаара түстэ.

Миитиҥҥэ Октябрьскай нэһилиэк баһылыга А.П. Семенов, Чөркөөх түмэлин сэбиэдиссэйэ М.А. Протодьяконов, П.А. Ойуунускай аатынан Судаарыстыбаннас түмэлин салайааччыта М.Г. Аржаков уонна Чөркөөх орто оскуолатын дириэктэрэ Е.В. Лебедев тыл эттилэр, сибэкки дьөрбөтүн уурдулар.

Бу күн Былатыан төрөөбүт балаҕана оттуллан, ыалдьыттары сылаастык көрүстэ. Кэлбит дьон ирэ-хоро кэпсэтэн, санааларын үллэстэн, аал уокка ас кээһэн, алгыс ылан астыннылар.

Былатыан Ойуунускай сиэн балта Елена Слепцова-Куорсуннаах истиҥ эҕэрдэтин тиэртэ:

“Платон Алексеевич – үйэлээх киһи, бэйэтэ үйэ, эпоха киһи. Ол иһин сыллата наһаа ньиргиэрдээх да буолбакка, маннык ахтылла турара, дойдутугар тахсаҥҥыт оһоҕун аһатан, ааттаан аастахха – ол улахан бэлиэтээһин. Дойдубар, биир дойдулаахтарбар улахан эҕэрдэтэ тиэрдиҥ – Муҥха Дэлбэрийбиккэ. Былатыан баар буолан биһиги бары көмүскэллээх курдук сананабыт. Эҕэрдэ, убайбыт төрөөбүт күнүнэн!”

Күн иккис аҥарыгар Чөркөөх оскуолатыгар үрдүкү кылаас үөрэнээччилэригэр аһаҕас мөккүөр, биктэриинэ, санаа атастаһыыта ыытылынна.