Былыргы ырысыаптары көрдүү «Тыгын Дархан» хамаандата Уус Маайаҕа айаннаата

«Тыгын Дархан» эрэстэрээн хамаандата Уус Маайа улууһугар гастрономическай эспэдииссийэҕэ турунна. Тэрээһин сүрүн сыала – былыргы ырысыаптары хомуйуу уонна саҥа менюга киирэр олохтоох бородуукталары үөрэтии.

Эспэдииссийэҕэ эбэҥки норуотун ытык кырдьаҕаһа Матрена Николаевна Иванова кыттар. Кини бэйэтин норуотун үгэстэрин, сиэрин-туомун уонна аһын-үөлүн туһунан билиилэрин кытта үллэстэр. Эрэстэрээн үлэһиттэрэ Уус Маайа улууһун сирдьиттэригэр ураты махтал тылларын биллэрдилэр. Кинилэр тайҕаҕа куттал суох буолуутун хааччыйаллар уонна сэдэх үүнээйилэр үүнэр  сирдэригэр сирдииллэр.
Тэрээһин биир сүрүн арыйыытынан бэс туорааҕа (сланик) буолла. Эрэстэрээн бренд-шефэ Николай Атласов онтон саҥа соус оҥоруоҕа. Ону таһынан, ааптарскай чэйгэ анаан бөрө ото уонна таас үрэх сэбирдэҕэ хомулуннулар. Бу оттор чаҕылхай, күүстээх амтаннара киин Саха сирин отторуттан биллэрдик уратылаах буолан, гастрономическай эспэримиэннэргэ саҥа кэскили арыйаллар.
«Төрүт үгэстэри харыстыыр эрэ буолбакка, саҥа тыыны киллэрэр биһиэхэ улахан суолталаах. Хас биирдии маннык айан – ытык кырдьаҕастарбыт сүбэлэрин-амаларын истэр, ураты билиилэри хомуйар уонна аныгы астыыр ньымалары кытта дьүөрэлиир кыах биэрэр. Биһиги Саха сирин устуоруйатын амтанын нөҥүө кэпсиир саҥа меню айабыт», — диэн эрэстэрээн хамаандата бэлиэтиир.