Былыргылыы баататтан оонньуур

Хаар курдук маҥан, сымнаҕас баататтан саамай дьикти, ураты оонньуурдар былыр харыйаны киэргэтэллэрэ. Ол курдук, 30-с сыллар ортолоруттан саҕалаан харыйаҕа аан бастакы баата оонньуурдар  баар буолбуттара.

Бастакы баата оонньуурдары өссө өрөбөлүүссүйэ инниттэн оҥорон саҕалаабыт маастарынан И. А. Русаков буолар. Кини “Все для ребенка” диэн артыалга үлэлии сылдьан, баата оонньуурдары оҥоруу кистэлэҥин үллэстибитэ. Билигин ол муода эргилиннэ.

Хайдах, тугу оҥоруохха сөбүй?

Баата оонньуур арааһын оҥорор Мария Долотова сатабылыттан үллэстэр. Оҥорорго наада: синньигэс боробулуоха, кыптыый, иистэнэр сап, акриловай кырааскалар уонна лаах, күрүчүөк, синньигэс быа (харыйа оонньуурун ыйыыр), баата. Киһини оҥорорго эбии: полимернай туой, момент килиэй, эбии араас киэргэллэр.

1. Холобур, киһини оҥорорго боробулуохаттан бастаан каркаас оҥоробут.

2. Боробулуоханы баатанан эрийэбит уонна сабынан туттарабыт.

3. Ол кэннэ ПВА килиэйи уонна строительнай килиэйи кыра ууга убатан баран бааталаан сыһыарабыт, куурдабыт. Куурбутун кэннэ чочуйан биэриэххэ сөп.

4. Барытын баатанан эрийэн, килиэйдээн баран акриловай кыраасканан сотобут. Куурбутун кэннэ үйэлээх буоллун диэн эмиэ акриловай лаахтыыбыт.

5. Оонньуур сирэйин полимернай туойунан бэйэ моһуоннаан оҥоробут. “Момент” килиэйинэн сыһыарабыт. Оннук түргэн. Сорохтор бэлэм молд ылаллар.

6. Сыһыарыллыбыт сирэйи акриловай кыраасканан, пастель харандаас көмөтүнэн кырааскалыыбыт уонна куурбутун кэннэ лаахтыыбыт.

7. Сирэй сыстыбытын, кырааскаламмытын кэннэ бэргэһэ, куобах кулгааҕын о. д.а. олордобут. Баата куукула, оонньуур оҥоруу — олус умсугутуулаах дьарык.

“Бэйэ оҥоһуга быдан күндү”

Мария Долотова, Үөһээ Бүлүү, учуутал:

— Үөһээ Бүлүү улууһун Дүллүкү нэһилиэгиттэн төрүттээхпин. Идэбинэн учууталбын, кэргэннээхпин, үс оҕолоохпун. Кыра сааспыттан уруһуйдуубун. Оҕолонон олорор кэммэр туорт оҥоруутунан үлүһүйбүтүм, онтон бу икки сылтан бэттэх Саҥа дьыллааҕы оонньуурдары оҥорор буоллум. Сүрэҕим сытар дьарыгын булбуппуттан үөрэбин. Саҥа дьыл тыына бэлэмнэнииттэн, тугу эрэ айыыттан-тутууттан үөскүүр. Сахалыы матыыптаах оонньуурдары оҥоробун. Хаһан баҕарар ис сүрэхтэн оҥоһуллубут бэйэ оҥоһуга быдан күндү буолар.