Былырыын саамай элбэх турист Өлүөнэ очуостарыгар сылдьыбыт

Саха сиригэр былырыын иллэрээ сыллааҕар элбэх турист кэлэн барда.

СӨ Урбаан, эргиэн уонна туризм министиэристибэтэ иһитиннэрбитинэн, 2025 сылга Саха сиригэр 844 327 турист сылдьыбыта бэлиэтэннэ. Ол иһигэр Саха сирин устун олохтоохтортон 558 266 турист сылдьыбыт. Өрөспүүбүлүкэ таһыттан 286 061 турист кэлбит, тас дойдулартан — 7500 кэриҥэ турист. Ордук элбэх турист – 700-тэн тахса киһи Кытай Өрөспүүбүлүкэтиттэн кэлэн барбыт. 2026 сылга Кытайтан турист ахсаана өссө элбиэхтээх. Ол ону эспиэртэр визата суох эрэсиими олохтооһуну уонна нэдиэлэҕэ иккитэ Дьокуускайтан Харбиҥҥа диэри быһаччы көтүү олохтоммутун кытта сибээстииллэр. Сөмөлүөт билиэтин сыаната ортотунан – 16 400 солкуобай.

Туристар ордук ЮНЕСКО аан дойдутааҕы нэһилиэстибэтинэн биллэр “Өлүөнэ очуостара” айылҕа национальнай пааркатын, Тымныы полюһунан аатырар Өймөкөөнү,  Сиинэ очуостарын анаан ааттаан кэлэллэр эбит. Ол курдук, ааспыт сылга “Өлүөнэ очуостара” айылҕа пааркатыгар 55 000 кэриҥэ турист кэлэн барбыт.

Туризмы сайыннарыы өрөспүүбүлүкэ биир стратегическай соругунан буолар. 2023-2024 сылларга «Туризм уонна ыалдьыттааһын индустрията» национальнай бырайыагынан 300 мөлүйүөнтэн тахса федеральнай субсидия тыырыллыбыт. Онон 2030 сылга диэри турист ахсаана үс төгүл элбиэхтээх.