«Бүлүү Боотур — 2025» кыайыылааҕа — Алексей Созонов!

Ытык Бүлүү алгыстаах ыһыаҕа түмүктэннэ. Быйыл Бүлүүгэ ураты суолталаах, икки бүк үөрүүлээх дьоһун ыһыах буолан ааста.

Ол курдук, Ытык Бүлүү алгыстаах ыһыаҕа Г.И.Чиряев төрөөбүтэ 100 сылыгар, Саха сиригэр Аҕа дойдуну көмүскээччи, Аҕа дойду Улуу сэриитин Кыайыы 80-сылыгар ананна. Дьаһалта чахчытынан, түһүлгэҕэ 3000 кэриҥэ киһи оһуохайдаан ойон, ыһыаҕы айхаллаатылар.

Ону таһынан ыһыах чэрчитинэн ыытыллыбыт «Бүлүү Боотур — 2025» күрэххэ саха успуордун 7 көрүҥнээх күрэхтэһиитигэр Орто Халыматтан хотугу многоборьеҕа успуорт маастара, РФ, Саха Өрөспүүбүлүкэтин чөмпүйүөнэ, «Дыгын оонньууларын» кыттыылааҕа, Арассыыйа чөмпүйүөнэ Алексей Созонов муҥутуур кыайыылаах аатын ылыан ылла.

«Бүлүү Боотур — 2025» күрэхтэһии иккис призерунан Өлөөн улууһуттан Айсен Семенов буолла. Үһүс үктэлгэ Уөһээ Дьаҥы улууһуттан Петр Прудецкай таҕыста. Бу туһунан улуус дьаһалтатын пресс-сулууспата иһитиннэрэр.

Алексей Созонов мас тардыһыытыгар 6 миэстэлээх, оттон «Оҕунан ытыы», «Кыыһы эккирэтии», «Үс төгүл үс», «Тутум эргиир» көрүҥнэригэр кыайыыны ситистэ.

Муҥутуур кыайыылаах 500 000 солк., иккис миэстэлээх 300 000 солк., үһүс миэстэлээх 200 000 солк. наҕараадаланнылар!