Бүлүү Дьөккөнүн үөрэнээччитэ Степанида Абрамоваҕа Сэбиэскэй Сойуус Дьоруойа Николай Кондаков аатынан истипиэндьийэ ананна

«Саха» НКИХ дириэктэрэ, Ил Түмэн дьокутаата  «СӨ Суруналыыстарын сойууһа» эрэгийиэннээҕи уопсастыбаннай тэрилтэ бэрэссэдээтэлэ Олег Марков быйылгы сыл төгүрүччү үбүлүөйдээх сыл буоларын бэлиэтээтэ.

«СӨ Суруналыыстарын сойууһа» эрэгийиэннээҕи уопсастыбаннай тэрилтэ бэрэссэдээтэлэ Олег Марков Ил Дархан Айсен Николаевка, сибээс уонна тэлэбиидэнньэ, араадьыйа сибээһин бары салааларын суруналыыстарыгар уонна бэтэрээннэригэр махталын биллэрдэ.

— Быйыл элбэх үбүлүөйдээх сыл: Улуу Кыайыы 80 сыла, Арассыыйаҕа араадьыйа төрүттэммитэ 130 сыла,  Саха араадьыйата төрүттэммитэ 95 сыла, Аҕа дойду Улуу сэриитин кыттыылааҕа,  Сэбиэскэй Сойуус Дьоруойа, Саха араадьыйатын суруналыыһа Николай Кондаков төрөөбүтэ 115 сыла уонна Н.А. Кондаков аатынан  искибиэр тутуллубута 15 сылын туолла.  «Саха» НКИХ генеральнай дириэктэринэн үлэлээбит Иван Андросов  бу искибиэри туттарыаҕыттан ыла манна 15 сыл устата өрөспүүбүлүкэ бастыҥ суруналыыстарыгар уонна Николай Кондаков төрөөбүт дойдутун Бүлүү улууһун Дьөккөн орто оскуолатын  туйгун үөрэнээччитигэр  Николай Кондаков аатынан бириэмийэни уонна истипиэндьийэни туттарабыт.

Араадьыйа үлэһиттэрэ бэйэлэрин үлэлэринэн Улуу Кыайыыны эмиэ уһансыбыттара. Кинилэр сүрүн оруоллара сүҥкэн: араас омук дьонун —  сэбиэскэй норуоту  биир сутурук буолар гына түмүү, дьон санаатын көтөҕүү, инникигэ эрэли үөскэтии. Аҥаардас Юрий Левитан курдук диктор «кыайыы буолара чугаһаата, тулуйуҥ, өссө кимэн киирэн өстөөҕү самнарыахха, Ийэ дойдубут туһугар кыахпытын түмэн күүстээхтик үлэлиэххэ диэн төһөлөөх үгүс дьону Улуу Кыайыыга сирдээбитэ буолуой? 1945 сыллаахха Саха сиригэр оруобуна 45 радиопередатчик баара. Онно сахалыы тылынан суруналыыс Михаил Белолюбскай 2 тыһыынчаттан тахса биэриини тылбаастаан, сахатын дьонугар тиэрдибитэ. Аҕа дойду Улуу сэриитигэр кыттыбыт Саха сирин 139 суруналыыһыттан 22 суруналыыс саха тэлэбиидэнньэтин уонна араадьыйатын үлэһиттэрэ этилэр.  Сэбиэскэй Сойуус Дьоруойунан буолбут соҕотох суруналыыс — Николай Кондаков. Кинилэр бары биир тэрилтэҕэ 10-тан тахса сыл үлэлээбит дьон. Биһиги хас биирдиилэрин ааттарын анаан ааттаан туран, «Саха» НКИХ дьиэтин сүрүн истиэнэтин толору анал былакааты ыйаатыбыт. Бу Улуу Кыайыы 80 сылынан буойун-суруналыыстары чиэстээхтик үйэтитиибит бэлиэтэ, — диэн санаатын сайа эттэ «Саха» НКИХ дириэктэрэ, норуот дьокутаата Олег Марков.

Хампаанньа салайааччыта барҕа махталын тиэртэ тэлэбиидэнньэ уонна араадьыйа бэтэрээннэригэр. Ол, курдук, араадьыйа бастакы диктордарыттан биирдэстэрэ Лира Белолюбская, тэлэбиидэнньэ бастакы опретордарыттан биирдэстэрэ Руф Егоров, «Саха» НКИХ ытык дьоно кэлэн, тэрилтэ үөрүүлээх тэрээһинигэр өрүү кытталларыгар махтал тылын истиҥин эттэ.

Бүгүн Аҕа дойду Улуу сэриитин кыттыылааҕа,  Сэбиэскэй Сойуус Дьоруойа, Саха араадьыйатын суруналыыһа Николай Кондаков төрөөбүтэ 115 сылыгар, «Саха» НКИХ кини аатынан искибиэригэр 15-с төгүлүн Бүлүү улууһун Дьөккөн орто оскуолатын  туйгун үөрэнээччитигэр  Николай Кондаков аатынан истипиэндьийэни туттардылар. Орто оскуолатын учууталларын педагогическай мунньаҕын анал боротокуолугар олоҕуран 2024-2025 үөрэх дьылыгар үөрэххэ уһулуччу ситиһиилэрин уонна оскуола уопсастыбаннай олоҕор көхтөөх кыттыытын иһин 9 кылаас үөрэнээччитэ Степанида Абрамова  суолталаах наҕарааданы «Саха» НКИХ  салайааччыта Олег Марков илиититтэн тутта.

Дьоһуннаах тэрээһин хампаанньа үлэһиттэрэ уонна бэтэрээннэрэ хаартыскаҕа түһүүлэринэн түмүктэннэ.