Бүлүү – Эдьигээн массыына кыһыҥҥы суола аһылынна

Өрөспүүбүлүкэтээҕи массыына суолун управлениетын бирикээһинэн, муус ыйааһыны уйарын бэрэбиэркэлээн баран, сэтинньи 21 күнүттэн Бүлүү уонна Эдьигээн улуустарыгар “Эдьигээн” суол “Бүлүү куората – Эдьигээн бөһүөлэгэ” массыына кыһыҥҥы суолун былааннаммыт болдьоҕун иннинэ арыйдылар.

Муус халыҥын кэмнээһиҥҥэ олоҕуран, 10 туоннаҕа диэри уйуктаах массыыналар сылдьаллара көҥүллэнэр.

Тырааныспар куттала суох сылдьарын хааччыйар инниттэн уонна кыһыҥҥы суол алдьамматын туһугар “СӨ массыына суолун управлениета” тэрилтэ, суоппардартан ыйыллыбыт ыйааһынтан таһаарымаҥ уонна суол бэлиэлэринэн тутуһан айаннааҥ диэн көрдөһөр. Бу туһунан СӨ массыына суолун управлениетын саайтыгар суруйаллар.