Бүлүү өрүс хаҥас кытылын нэһилиэнньэлээх пууннарын гаастааһына саҕаланыа

Быйыл Саха сиригэр Бүлүү өрүс хаҥас кытылын нэһилиэнньэлээх пууннарын гаастааһынын саҕалыахтара. Бүгүн, олунньу 15 күнүгэр, буолбут сүбэ мунньахха Ил Дархан Айсен Николаев «Суол каартатын» бигэргэттэ.

«Бүгүн Бүлүү өрүс хаҥас кытылын эрэ буолбакка, бүтүн өрөспүүбүлүкэ үрдүнэн гаастааһыҥҥа олус улахан суолталаах бэлиэ түгэн буолла. Бүлүү өрүс хаҥас кытылыгар сытар нэһилиэнньэлээх пууннары гаастааһынын былаана номнуо 20-чэ сыл устата дьүүллэһиллибитэ. Ол гынан баран, араас төрүөтүнэн – ардыгар технологическай, ардыгар тэрээһиннэри ыытыы, ардыгар үп-харчы өттүнэн  — ити боппуруос быһаарыллыбатаҕа. Мин сорудахпынан, ааспыт сылга «Сахатранснефтегаз» хампаанньа Бүлүү өрүс хаҥас кытылын гаастааһыныгар улахан үлэни ыыппыта уонна бүгүн бүтэһиктээх быһаарыы ылынныбыт — «Суол каартатын» бигэргэттибит», – диэтэ Айсен Николаев.

Баһылык бырайыагы олоххо киллэрэргэ өрөспүүбүлүкэ бүддьүөтүн таһынан дойду Бэрэсидьиэнэ Владимир Путин сорудаҕынан дойдуга социальнай гаастааһынынан дьарыктанар «Сахатранснефтегаз» уонна «Газпром» хампаанньалар үптэрэ-харчылара туһаныллыахтара. Үөһээ Бүлүү улууһунан нэһилиэнньэлээх пууннарын гаастааһынын үлэтэ торумнанна, Ньурба оройуонугар сөбүлэһиигэ сылдьар.

Сүбэ мунньах сүрүн тиэмэтинэн Бүлүү өрүс хаҥас кытылын нэһилиэнньэлээх пууннарын гаастааһынын туһунан дакылааты Бырамыысыланнас уонна геология миниистирэ Максим Терещенко уонна «Сахатранснефтегаз» АХ генеральнай дириэктэрэ Алексей Колодезников билиһиннэрдилэр.

«Орто Бүлүүтээҕи ГКМ – Мастаах – Бэргэ – Дьокуускай куорат гаас ситимигэр холбонуохтаах Үөһээ Бүлүү оройуонун 10 нэһилиэнньэлээх пууннарын гаастааһыныгар «Суол каартата» оҥоһулунна. Саҥа схемаҕа сөп түбэһиннэрэн, тутуу үлэтэ Тамалакаан сэлиэнньэтиттэн саҕалаан, гаас ситимэ Бүлүү өрүһү туоратар былааннаахтар. Онуоха, инникитин Ньурба оройуонун нэһилиэнньэлээх пууннарын, ол иһигэр Ньурба куоратын гаастааһына сабаҕаланар», — диэн миниистир Максим Терещенко иһитиннэрдэ.

«Сахатранснефтегаз» АХ генеральнай дириэктэрэ Алексей Колодезников бэлиэтээбитинэн, 2029 сылга диэри үлэ бастакы түһүмэҕэр Дүллүкү, Хомустаах, Хоро нэһилиэктэри гаастааһына былааннанар.

«Бырайыак иккис уонна үһүс түһүмэҕин олоххо киллэрии кэмигэр 2031 сылга диэри Бүлүү өрүс хаҥас кытылын атын нэһилиэнньэлээх пууннарыгар гаас ситимэ тардыллыахтара», — диэтэ Алексей Колодезников.

Ил Дархан сорудаҕынан магистральнай гаас ситимин уонна бөһүөлэктэр икки ардыларынааҕы гаас магистральнай ситимин тутуутугар бырайыактыыр-симиэтэлиир докумуоннары оҥоруу быйыл олунньу ыйга саҕаланыа.

Санатан эттэххэ, РФ Бэрэсидьиэнэ Владимир Путин көҕүлээбит социальнай гаастааһын бырагырааматын олоххо киллэрии тэтиминэн Саха сирэ Уһук Илиҥҥэ инники күөҥҥэ сылдьар уонна 10 бастыҥ эрэгийиэннэр иһигэр киирэр.