Бүлүү өрүскэ ньиэп тохтубутун ыраастаатылар

Бэс ыйын 22 күнүгэр Үөһээ Бүлүү улууһугар Бүлүү өрүскэ бэнсиин, уматык тохтубута бэлиэтэммитэ. Бэс ыйын 23 күнэ үүнэр түүнүгэр Бүлүү өрүскэ быыһааччылар ньиэп тохтубут суолун суох оҥорууга үлэлээтилэр. Бу туһунан Саха сирин Быыһыыр сулууспата иһитиннэрэр.

Бүлүү өрүскэ 3-15 миэтэрэ кэтиттээх ньиэп бородууктата тохтубута уста сылдьаллара булуллубута. Ким тохпута булулла илик. Олохтоохтор этэллэринэн, уматыгы тиэммит баржа кэлэн барбытын кэнниттэн, булуллубут. Тута Бүлүү этэрээтин быыһааччылара, дьаһалта үлэһиттэрэ, экологтар баран, чинчийиини ыыппыттара. Дьокуускайтан «КамАЗ» массыынанан анал тэриллэри тиэнэн, алта исписэлиис айаҥҥа туруммута.

Ньиэп тохтубут суола Үөһээ Бүлүү сэлиэнньэтиттэн Дүллүкү бөһүөлэгэр диэри, 15 килэмиэтир уһуннаах сиринэн  субуллубута. Онон улууска   бэлэмнээх буолуу үрдүк эрэсиимин биллэрбиттэрэ. Өрүстэн ууну ылыы, сөтүө бобуллубута.

Быыһааччылар 400 киилэ оборторор сорбены, ньиэби хомуйар анал тэриллэри,  сүүрүк устун салгыы барарын тохтотор боннары, быстах кэмҥэ харайар иһиттэри туһаннылар.

Ньиэп тохтубутун сорбенынан обортордулар. Бүлүү куорат аттынааҕы өрүс кытылыгар сорбеннары ыстылар. Түүннэри үлэлээн, сарсыарда 6 чаас саҕана ньиэп бээтинэлэрин барытын суох оҥордулар диэн Быыһыыр сулууспа иһитиннэрэр. Бүгүн Бүлүү өрүскэ бу үлэлэринэн өссө бэрэбиэркэлэри оҥоруохтара.

Тырааныспар борокуратуурата бэрэбиэркэни саҕалаата. Саха сирин силиэстийэлиир отделын силиэдэбэтэллэрэ экология өттүнэн кутталлаах бэссэстибэлэри харайыыга, таһыыга быраабылалар кэһиллибиттэрин бэрэбиэркэлиир үлэни ыыталлар.