Бүлүү өрүскэ ууга түспүт киһи өлүгүн буллулар

Былырыын түөрт доҕордуу уолаттар ууга түспүттэрин туһунан иһитиннэрии куйаар ситимигэр тарҕанан, үгүс дьону дьиксиннэрбитэ.

Ол кэмҥэ биир киһи тута булуллубута. Оттон үс уолу быыһыыр сулууспалар өрүскэ муус туруор диэри суһал-көрдүүр тэрээһиннэри ыыппыттара. Бүлүү өрүс түгэҕин араас ньыманан, уу анныгар устар уонна уһулар камераларынан чинчийэн көрөн булбатахтара.

Оттон бүгүн, бэс ыйын 4 күнүгэр, оройуоннааҕы электростанция үлэһиттэрэ өрүс нөҥүө уот ситимин көрө тахсыбыт кэмнэригэр, сүппүт уолаттартан биирдэстэрин өлүгүн буллулар. Бу туһунан Сунтаар улууһун дьаһалтатын пресс-сулууспата иһитиннэрэр.

Сунтаар улууһун ыксаллаах быһыыга-майгыга хамыыһыйатын бэрэссэдээтэлэ Николай Александров туһааннаах сулууспалары кытта суһал мунньаҕы тэрийэн ыытта. Манна полиция, ГИМС, ЫБММ, улуус быыһыыр сулууспаларын, хомунаалынай сулууспа, авиалесоохрана тэрилтэлэрин үлэһиттэрэ кытыннылар.

Бу күннэргэ эрдэ булуллубатах икки уолаттары биэрэк кытыытынан көрдүүр тэрээһиннэри сөргүтүөхтэрэ.