Бүлүү өрүскэ водолазтар массыынанан ууга түспүт эр киһи өлүгүн буллулар

Ыам ыйын 30 күнүгэр Үөһээ Бүлүүтээҕи ЕДДС сулууспатыгар 45 саастаах эр киһи сураҕа суох сүппүтүн туһунан иһитиннэрии киирбит.

Силиэстийэ быһаарыытынан, ыам ыйын 28 күнүгэр киэһэ 21:00 чааска эр киһи биир идэлээхтэрин кытта көрсүһэ дьиэтиттэн тахсан барбыт. Ыам ыйын 29 күнүн түүнүгэр кини биир кэллиэгэтин дьиэтигэр илдьэн биэрбит, ол кэнниттэн сибээскэ тахсыбат буолбут.

Бу туһунан Саха сиринээҕи Быыһыыр сулууспатын пресс-сулууспата суруйар. Эр киһи «Toyota Probox» мааркалаах массыынанан сылдьыбыт. Көрдүүр үлэлэр туох да түмүгү аҕалбатахтар. Кэлин Бүлүү өрүскэ ньиэп тохтубута бэлиэтэммитин булбуттар. Ол кэннэ эр киһи масыынатын кытта ууга түспүтэ буолуо диэн уорбалааһын үөскээбит.

Бэс ыйын 2 күнүгэр көрдүүр үлэлэргэ Саха сиринээҕи Быыһыыр сулууспатын водолазтара кыттыбыттар. Бэс ыйын 3 күнүгэр Бүлүү өрүһү чинчийии түмүгэр ууга түспүт массыына көстүбүт. Массыына иһигэр сүппүт эр киһи өлүгэ булуллубут.