«Бүлүү» федеральнай суолунан айан сөргүтүлүннэ

Ааспыт өрөбүллэргэ Бүлүү бөлөх улуустарыгар улахан ардахтар түһэннэр «Бүлүү» федеральнай суолун 597 км (Бүлүү куорат уонна Чыбыыда үрэх икки арда) айан суола алдьанан, сырыы харгыстана сырытта.

Бу туһунан СӨ суолу кэтээн көрөр судаарыстыбаннай иниспиэксийэ иһитиннэрэр.

Бүгүн, атырдьах ыйын 14 күнүнээҕи туругунан, бу учаастакка тырааныспар хаайтаран турара бэлиэтэммэт. СӨ массыына суолларын салалтата иһитиннэрбитинэн, тырааныспар бары көрүҥэр айан сырыыта сөргүтүллүбүт. Суол алдьаммыт сирдэригэр бэдэрээттээх тэрилтэлэр дьуһуурустубалыыллар.

Онон СӨ суолу кэтээн көрөр судаарыстыбаннай иниспиэксийэ ыраах айаҥҥа сылдьар суоппардарга күн-дьыл усулуобуйатын учуоттаан суол быраабылатын тутуһаргытыгар көрдөһөр.