Бүлүү хуора Владивостоктан ситиһиилээх эргилиннэ

Алтынньы 27 күнүттэн сэтинньи 1 күнүгэр диэри Владивосток куоракка буолбут Уһук Илиҥҥи III хуор олимпиадатыгар Арассыыйа 16 эрэгийиэниттэн хуор 93 кэлэктиибэ уонна Кытай Норуодунай Өрөспүүбүлүкэтин кэлэктииптэрэ кытыннылар (барыта 2300 кыттааччы). Хуор олимпиадата -– норуоттар икки ардыларынааҕы куонкурус уонна хуор Бүтүн Арассыыйатааҕы бэстибээлэ. Олимпиада быйыл аан бастаан норуоттар икки ардыларынааҕы таһымҥа таҕыста.

Олимпиада туһунан СӨ култууратын үтүөлээх үлэһитэ, Арассыыйа Суруналыыстарын сойууһун чилиэнэ Надежда Иванова иһитиннэрдэ:
«Биһиги Бүлүүтээҕи своднай самодеятельнай хуорбут олимпиадаҕа хормейстер, СӨ култууратын үтүөлээх үлэһитэ Ольга Корякина салалтатынан атырдьах ыйыттан бэлэмнэммитэ. Концертмейстер – СӨ култууратын туйгуна Ольга Тимофеева.
Хуор 39 ырыаһыттаах. Сүрүн састаап Бүлүү куораттан турар, кыттааччылар Чинэкэттэн, Тыымпыттан уонна Дьокуускай куораттан бааллар. Кинилэр бары араас тэрилтэҕэ үлэлииллэр, араас идэлээхтэр. Ол гынан баран, кинилэри көхтөөх олох, ырыа ускуустубатыгар таптал ситимниир. Куонкуруска бэлэмнэнии -– кэлэктиип, хормейстер уонна концертмейстер сүҥкэн үлэлэрэ, куонкурус репертуарын үөрэтэргэ күн аайы эрэпэтииссийэлэр, тэрээһин уонна айан боппуруостарын быһаарыы.
Биһиги хуорбут куонкуруска пуойаһынан үс суукка айаннаан тиийбитэ. Олимпиадаҕа «Смешанные хоры» көрүҥҥэ  кыттыбыта. Манна  Авиатутааччылар култуура дыбарыастарын норуодунай академическай хуора (Комсомольск-на-Амуре), Петрозаводскайдааҕы судаарыстыбаннай университет академическай хуора (Петрозаводск, Карелия), «Россияне» норуодунай академическай хуор (Чита, Забайкалье кыраайа), Уһук Илиҥҥи федеральнай университет академическай хуора (Владивосток, Приморье кыраайа), «Хайфэн» Пекин хуора уо.д.а. биллэр-көстөр кэлэктииптэр кытыннылар.
Куонкурус бырагыраамата 4 айымньыттан турда. Биһиги хуорбут «От-мас иччилэрин хуора», «Серенада», «Случайный вальс» «Айан ырыата» айымньылары  толордо.
Кыайыылаахтары Саратов консерваториятын ректора Александр Занорин бэрэссэдээтэллээх Москва, Санкт-Петербург, Шанхай уонна Минскэй бэрэпиэссэрдэриттэн турар аптарытыаттаах дьүүллүүр сүбэ быһаарда.
Биһиги олимпиада түмүктэрин быһа көрдөрүүгэ долгуйа күүппүппүт. Бүлүүтээҕи хуорга Бүтүн Арассыыйатааҕы бэстибээл уокуруктар туурдарыгар 2-с истиэпэннээх лауреат дипломун уонна норуоттар икки ардыларынааҕы куонкурус үрүҥ көмүс мэтээлин туттарар туһунан иһитиннэриини төһөлөөх үөрэн уонна киэн тутта истибиппит буолуой?
Айар дьон маннык улахан күрэхтэһиигэ  баран ситиһиилэнэн кэлбитигэр улуус баһылыга С.Н.Винокуровка, Култуура сайдыытын уонна норуот айар талаанын оройуоннааҕы киинин салайааччы А.А. Дашевскаяҕа, тэрилтэлэр салайааччыларыгар, модельер-иистэнньэҥ А.П. Протопоповаҕа уонна бары көмөлөспүт дьоҥҥо өйөбүллэрин иһин махтанабыт.
Хуор ырыаһыттарын үрдүк наҕараадаларынан эҕэрдэлиибит. Эһигинэн уонна талааҥҥытынан киэн туттабыт. Өссө 1921 сыллаахха тэриллибит Бүлүү хуорун үгэстэрин харыстааһыҥҥа уонна сайыннарыыга биллэр кылааккыт иһин махтанабыт».

Дьүүллүүр сүбэ чилиэнэ, Муусука Белорустааҕы судаарыстыбаннай академиятын хуорга дирижердааһын кафедратын бэрэпиэссэрэ Инесса Бодяко куонкурус кыттааччылар ахсааннарынан эрэ буолбакка, тэрээһин таһымынан норуоттар икки ардыларынааҕы статустааҕын бэлиэтээтэ. «Мин дууһабын уонна сүрэхпин Саха сирин толорооччулара долгуттулар, тоҕо диэтэххэ, мин, биллэн турар, маннык култуураны кытары билсэр кыаҕым суоҕа. Ол иһин, устудьуоннарбын, муусукааннары олох атын култуураны кытары билиһиннэрэр туһугар нуота партитурдарын хас да экземплярын бэйэбэр хаалларынным» —  диэбитэ улахан билинии буолар.