Бүлүү Кыргыдайын олохтоохторо ытык кырдьаҕастарынан киэн тутталлар

Бүлүү улууһун  Кыргыдай нэһилиэгэр бүгүҥҥү күҥҥэ  түөрт тыыл бэтэрээнэ, 13 сэрии сылын оҕолоро олороллор.

Нэһилиэк ытык кырдьаҕастарын туһунан «Дайыы» түмсүү салайааччыта Елизавета Наумова  маннык киэн тутта кэпсээтэ:

— Саамай саастаах ытык кырдьаҕаспыт Егор Гаврильевич Константинов  быйыл 96-с хаарын уулларда. Кини 11 оҕо дьоллоох аҕата, элбэх сиэн, хос сиэн эһээтэ.  Ытык киһи «100 сааспар тиийбит киһи» диэн баҕа санаалаах. Оттон   Николай Егорович Егоров 10 оҕо амарах аҕата, эмиэ элбэх сиэн, хос сиэн эһээтэ. Быйыл 94-c хаарын хаардаан, эмиэ «этэҥҥэ сылдьыбыт киһи» диэн санаалаах.

90-нарын ааспыт ытык кырдьаҕастарбыт үөлээннээхтэрэ, бэйэлэрэ ааттыылларынан, «биир маанылаах кыыстара» эмиэ үтүмэн сиэн, хос сиэн эбээтэ, нэһилиэкпит убаастанар олохтооҕо, Мэҥэ Хаҥаластан эдэркээн саастааҕар Кыргыдайга кийиит буолан кэлбит  Регина Михайловна Попова 93-с хаарын уулларда. Кини оҕолорун сылаас сыһыаннарыгар угуттанан, этэҥҥэ олорор. Бу ааттаммыт дьоммутугар эбии киэн тутта  93-с сааһыгар сылдьар  Афанасий Осипович Матвеев аатын ааттыыбыт. Ытык кырдьаҕас үйэтин тухары тимир көлөнү доҕор оҥостубут киһи, олус элэккэй майгылаах буолан, доҕоро-атаһа үгүс. Бу кэпсиир ытыктанар кырдьаҕастарбыт бары нэһилиэкпит бочуоттаах олохтоохторо Кинилэр тахсыылаах үлэлэрин туоһулара — түөстэрин  толору киэргэтэр наҕараадалара.

Улуу Кыайыы күнүн иннинэ  балаҕаммытыгар олохтоох дьаһалта, бэтэрээннэр сэбиэттэрэ,  култуура үлэһиттэрэ  тыыл бэтэрээннэрин, сэрии сылларын оҕолорун, үлэ бэтэрээннэрин  ыҥыран, итии үүттээх чэйи кутан чэйдэттибит.

Ытык дьоммут ирэ-хоро кэпсэтэр кэмнэригэр, биһиги ыллаан, үҥкүүлээн сэргэхситтибит.

Кырдьаҕастарбыт «эһиил бары эмиэ маннык тутуспутунан  көрсөрбүт буоллар» диэн баҕа санаалаах тарҕастылар.

Улуу Кыайыы бырааһынньыгар Кыргыдай нэһилиэгиттэн Аҕа дойду Улуу сэриитигэр барбыт дьоммут албан ааттара суруллубут буойуттар мемориальнай дуоскаларын былаһааккатыгар ытык-мааны кырдьаҕастарбыт бэйэлэрин илиилэригэр тутан аҕалан,  Өйдөбүнньүк гирлянда уурдулар.  Үөрүүлээх миитиҥҥэ баһылыкпыт  Василий Александров тыыл бэтэрээннэригэр Махтал суруктары, бэлэхтэри туттарда. Бу күн «Полевой куукуна» үлэлээтэ.

Түөлбэлэр салайааччылара минньигэс амтаннаах гречка, мааннай хааһы, хара килиэп буһаран, олохтоохтору күндүлээтилэр.

Ити курдук, кыргыдайдар эйэлээх олоҕу аҕалбыт ытык дьоннорун ааттарын үйэлэргэ киэн туттан, махтанан, ааттарын дорҕоонноохтук ааттыы туруохтара.

Аҕа көлүөнэ үтүө үгэһин оҕолоро уонна сиэннэрэ салгыыллар.