Бүлүү Оһуокайын кэскилэ — оҕолор

Ахсынньы 7 күнүгэр Оһуокай куоракка олорор Бүлүү улууһун олохтоохторугар ананна.

Куоракка олорор Бүлүү улууһуттан төрүттээх этээччилэри сэргэ, Дьокуускай куорат 2 нүөмэрдээх орто оскуолатыттан уонна гимназиятыттан үөрэнээччилэр кэлэн эттилэр.

Оһуокай алгыстан саҕаланна. Алгыһы Саха сирин үтүөлээх этээччитэ Петр Григорьев оҥордо. Аал уоту оттон Петр Семенович Аар Айыылартан кыайыыны көрдөстө, ол кэнниттэн оһуокайынан түһүлгэ таһаарда. Бүгүн Бүлүүттэн төрүттээх этээччилэри сэргэ үөрэнээччилэр Уля Егорова, Оля Мухоплева, Витя Васильев, Мичийээнэ Никитина эттилэр. Кинилэри сэргэ үтүөлээх этээччилэр Мария Иванова, Николай Трофимов түһүлгэни таһаардылар. Куоракка бүлүүлэр түмсүүлэрин салайааччыта Гавриил Степанович Евсеев, Бүлүү улууһун Оһуокайын түмсүүтүн салайааччыта, Ил Дархан стипендиата Светлана Тарасовна Иванова биир дойдулаахтарын эҕэрдэлээтилэр, Бүлүү улууһун культуратын салайааччыта А.Дашевская аатыттан Махтал суругу туттардылар.

Элбэх ыалдьыт оҕолор көхтөөхтүк кэлэн кыттыбыттарын биһирээтилэр, сиппит этээччилэр курдук этэллэрин хайҕаатылар. СӨ култууратын үтүөлээх үлэһитэ, судаарыстыбаннай  сулууспа бэтэрээнэ Зоя Васильевна Рожина Оһуокай түмсүүтэ улуустарынан тэрээһинин хайҕаата. Этээччилэр тыллара-өстөрө хомоҕойун,алгыстааҕын бэлиэтээтэ.

Марта Николаева