Бүлүү Тааһаҕарыгар норуот тыйаатырдара күннээтилэр

Бу күннэргэ саха литературатын суругун—бичигин 125 сылыгар анаан Бүлүү улууһун Тааһаҕардааҕы  «Эйгэ» норуот айымньытын дьиэтин тэрийиитинэн «Эгэлгэ Мааска – 2025» норуот тыйаатырдарын икки ардыларыгар аһаҕас күрэс буолан ааста.

«Эйгэ» Норуот айымньытын дьиэтин уус-уран салайааччыта Гульнара Алексеева маннык сырдатта:

— Тэрээһин быйыл үбүлүөйдээх 15-с төгүлүн ыытылынна. Бастакы куонкурус 2006 сыллаахха саха народнай суруйааччыта, Социалистическай Үлэ Дьоруойа Д.К. Сивцев—Суорун Омоллоон үбүлүөйдээх 100 сааһыгар анаан  драматическай кэлэктииптэр истэригэр буолбута. Быйылгы күрэскэ ыраахтан-чугастан норуот тыйаатырдара мустан, 72 чулуу, талааннаах артыыстар чаҕылхай испиктээктэри көрдөрдүлэр.

 «Эгэлгэ Мааска-2025» күрэс үөрүүлээх арыллыытыгар «Эйгэ» Норуот айымньытын дьиэтин  дириэктэрэ — Клавдия Петрова уонна олохтоох дьаһалта аатыттан баһылык солбуйааччыта Ульяна Григорьева, тыйаатыр артыыстарын, режиссердарын эҕэрдэлээтилэр. Дьүүллүүр сүбэҕэ  бэрэссэдээтэлинэн РФ театральнай диэйэтэллэрин сойуустарын чилиэнэ Арсен Семенов, РФ үөрэҕириигэ уонна наукаҕа бочуоттаах үлэһитэ, СӨ үөрэҕириитин үтүөлээх үлэһитэ, СӨ култууратын уонна үөрэҕириитин туйгуна Анастасия Новгородова, уус-уран самодеятельность бэтэрээнэ, Бүлүү улууһугар култуура уонна духуобунас сайдыытыгар үтүөтүн иһин бэлиэ хаһаайына, «Эгэлгэ» көр-күлүү норуот тыйаатырын артыыската Наталья Григорьева үтүө суобастаахтык үлэлээтилэр, дьоһуннаахтык сыаналаатылар.

Норуот тыйаатырдарын икки ардыгар күрэһи бастакынан И.М. Гоголев-Кындыл аатынан Бүлүүтээҕи норуот тыйаатыра Иннокентий Попов айымньытынан «Хабах Хабырыыс мүччүргэннээх сырыылара” испиктээгэ саҕалаабыта. Режиссер – СӨ култууратын үтүөлээх үлэһитэ Маргарита Соколова. Артыыстар көрдөөх бэртээхэй оруоллары хас биирдиилэрэ уратытык арыйан, дохсун ытыс тыаһын ыллылар. Үөһээ Бүлүүтээҕи И.С. Семенов аатынан Олоҥхо норуот тыйаатыра Борис Павлов айымньытынан «Кэрэтэ суох олох туругурбат” музыкальнай испиктээгинэн дьон кутун тутта. Артыыстар, эчи, ырыаһыттара, хамсаныылара, уот-күөс оонньооһуна өссө киэргэттэ. Режиссер – Сайыына Васильева. Чочутааҕы С.И. Иванов-Чочу Сэмэнэ аатынан норуот тыйаатыра Н.М. Заболоцкай- Чысхаан айымньытынан «Мааппа” испиктээги итэҕэтиилээхтик туруоран, көрөөччү биир тыынынан көрдө. Режиссер – Степанида Трофимова. Тааһаҕардааҕы «Эгэлгэ» көр-күлүү норуот тыйаатыра Д.К.Сивцев-Суорун Омоллоон  суруйуутунан “Күөх Көппө” испиктээги туруоран, көрөөччүлэри сөхтөрдүлэр, артыыстар бары уобарастарыгар киирэн, оччотооҕу кэмҥэ олорор курдук оонньоотулар, көрөөччүнү итэҕэттилэр. Режиссер – Михаил Шамаев. Бу тыйаатыр соторутааҕыта Чурапчыга өрөспүүбүлүкэтээҕи VIII төгүлүн ыытыллар “Алыптаах Мааска» норуот тыйаатырдарын бэстибээллэригэр кыттан, 15 норуот тыйаатырыттан “Кыайыыга дьулуурун иһин” анал аатынан наҕараадаланан, үөрүү-көтүү үктэллэнэн кэлбиттэрэ.

   “Эгэлгэ Мааска — 2025” күрэх түмүгүнэн маннык наҕараадалар, бириистэр олохтоннулар: “Кылаан Чыпчаал” үрдүк аатын ылла Үөһээ Бүлүүтээҕи И.С. Семенов аатынан «Олоҥхо» норуот тыйаатыра, Борис Павлов «Сюзанна» айымньытынан «Кэрэтэ суох олох туругурбат». «Бастыҥ режиссер»: Сайыына Васильева, Үөһээ Бүлүү; «Дьахтар бастыҥ оруола»: Людмила Леонтьева, Бүлүү куората;  «Эр киһи бастыҥ оруола»: Михаил Шамаев, Тааһаҕар нэһилиэгэ; « Эр киһи бастыҥ иккис былаан оруола»: Валерий Иванов, Үөһээ Бүлүү; « Дьахтар бастыҥ иккис былаан оруола»: Анна Ефремова, Үөһээ Бүлүү; «Бастыҥ грим»: Тааһаҕардааҕы «Эгэлгэ» көр-күлүү норуот тыйаатыра; Айымньыны чаҕылхайдык арыйбыт театр: Тааһаҕардааҕы «Эгэлгэ» көр-күлүү норуот тыйаатыра «Күөх Көппө»; “Көрөөччү биһирэбилэ”: Бүлүүтээҕи И.М. Гоголев-Кындыл аатынан норуот тыйаатыра, «Хабах Хабырыыс мүччүргэннээх сырыылара»; «Тааһаҕар нэһилиэгэ» (тыа сирин түөлбэтэ) муниципальнай тэриллии анал бирииһэ: Чочутааҕы С.И. Иванов-Чочу Сэмэнэ аатынан норуот тыйаатыра, «Мааппа»;  «Бастыҥ көстүүм»: Надежда Евсеева — Мааппа оруола; Айымньыны бастыҥ арыйыы: Үөһээ Бүлүүтээҕи И.С. Семенов аатынан «Олоҥхо» норуот тыйаатыра, Борис Павлов «Сюзанна» айымньытынан «Кэрэтэ суох олох туругурбат»; «Эгэлгэ» норуот театрын анал бирииһэ: Бүлүүтээҕи И.М. Гоголев-Кындыл аатынан норуот тыйаатыра, «Хабах Хабырыыс мүччүргэннээх сырыылара».

Анал бириистэри туруорбут «Тааһаҕар нэһилиэгэ» муниципальнай тэриллиигэ (тыа сирин түөлбэтэ) — баһылык Семен Каратаевка, Н.Н.Каратаев аатынан Тааһаҕар орто оскуолатын дириэктэригэр Капитон Львовка, «Мичээр» оҕо сэбиэдиссэйэ Наталья Семеноваҕа, олох-дьаһах коммунальнай хаһаайыстыба Тааһаҕардааҕы учаастагын салайааччыта Родион Осиповка, «Силээн» ИП Марта Прокопьеваҕа улахан махталбытын тириэрдэбит.