Бүлүү улууһугар аракыата икки тобоҕо көһүннэ

От ыйын 25 күнүгэр «Восточнай» космодромтан «Ионосфера-М» № 3, № 4/ППН спутниктардаах «Союз-2-1б» аракыата көтүтүллүбүтэ. Аракыата арахсар тобохторо Саха сирин икки оройуонугар — Алдан уонна Бүлүү улуустарыгар түстүлэр.

Бу туһунан Саха сиринээҕи Быыһыыр сулууспатын пресс-сулууспата иһитиннэрэр. Бүлүү улууһугар АО «ЦЭНКИ», «ВПК «НПО машиностроения» АУо бэрэстэбиитэллэрэ тобохтору көрдүүр үлэни ыыттылар. Бу дьаһаллар СӨ Экологияҕа министиэристибэтин уонна Саха сиринээҕи Быыһыыр сулууспатын кытта бииргэ ыытыллаллар. Экологтар айылҕа эйгэтин компоненнарыттан (буортан, сир үрдүнээҕи ууттан) пробалары ылан, гамма-сардаҥа таһымын кээмэйдээтилэр. Ылыллыбыт пробалар чинчийии түмүгэ тутулуга суох уонна объективнай буоларын хааччыйар сыалтан, аккредитациялаах икки лабораторияҕа ыытыллыахтара — биирэ Дьокуускайга, иккиһэ Хабаровскайга. Бу үлэ сорҕото эрэ, тоҕо диэтэххэ, инникитин аракыата арахсар чаастарын булуллубут тобохторун эвакуациялыыр үлэ күүтэр. Ону «ВПК «НПО машиностроения» АУо исписэлиистэрэ уонна Саха сирин Быыһыыр сулууспатын быыһааччылара салгыахтара.

Үөһээ Бүлүүтээҕи көрдүүр-быыһыыр этэрээт быыһааччылара, Быыһыыр сулууспа Аэромобильнай этэрээтин начаалынньыгын солбуйааччы Павел Алексеев салайыытынан, булуллубут тобохтору бөртөлүөккэ тиэйэргэ табыгастаах гына бэлэмниэхтэрэ. Салгыы тобохтору контейнерга уган, «Восточнай» космодромҥа тиэрдиэхтэрэ. Бу үлэ ситэриилээх былаас уонна олохтоох салайыныы уорганнарын өттүттэн мэлдьи хонтуруолга турар.