Бүлүү улууһугар аракыата тобохторун буллулар

Бүгүн, ахсынньы 3 күнүгэр, Бүлүү улууһугар СӨ Быыһыыр сулууспатын көрдүүр бөлөҕө уонна «Роскосмос» бэрэстэбиитэллэрэ тыа быыһыттан «Союз 2-1а» аракыата уматыктаах бааҕын киин блогун буллулар диэн СӨ Быыһыыр сулууспата иһитиннэрэр.

«Фрегат» түргэтэтэр блоктаах уонна 2-с №-дээх «Кондор-ФКА» космическай аппарааттаах «Союз 2-1а» аракыата сэтинньи 30 күнүгэр «Восточнай» космодромтан көппүтэ. Аракыата сүрүн сыалынан сири үөһээттэн үрдүк хаачыстыбалаахтык хаартыскаҕа түһэрии буолар.

— Булуллубут фрагмент ыйааһына — 3,5 туонна, уһуна — 23 миэтэрэ. Боруоба ыллыбыт, бөртөлүөт былаһааккатын бэлэмниибит. Сэтинньи 5 уонна 30 күннэригэр икки аракыата көппүтэ. Бүлүү улууһуттан үс фрагмент булулунна. Салгыы үлэлэр кэлэр сыл ыам ыйыгар ыытыллыахтара, — диэн Быыһыыр сулууспа аэромобильнай көрдүүр-быыһыыр салаатын начаалынньыгын солбуйааччы Павел Алексеев иһитиннэрэр.