Бүлүү улууһугар саҥа хотон үлэҕэ киирдэ

Бүлүү улууһун Халбаакы нэһилиэгэр  100 миэстэлээх саҥа хотон аһылынна.

«Халбаакы» оҥорон таһаарар кэпэрэтиибин саҥа эбийиэгэ өрөспүүбүлүкэ Тыатын хаһаайыстыбатын уонна ас-үөл бэлиитикэтин министиэристибэтин кыра кыамталаах тыа хаһаайыстыбатын эбийиэктэрин тутууга көрбүт субвенциятын суотугар тутулунна. Тутууга анаммыт үп кээмэйэ 6,5 мөл. солкуобай.

«Халбаакы» оҥорон таһаарар кэпэрэтиипкэ 310 төбө ынах сүөһү иитиллэр, онтон 142-та – ыанар ынах, 139-һа – сылгы. Кэпэрэтиип бэрэссэдээтэлэ Баһылай Протопопов иһитиннэрбитинэн, быйылгы от үлэтин түмүгүнэн 475 туонна от, 157 туонна сенаж оттоммут. 298 туонна үүт туттарыллыбыт.

Өрөспүүбүлүкэ судаарыстыбаннай бүддьүөтүттэн 108 тыа хаһаайыстыбатын эбийиэгин тутууга уонна саҥардыыга 587,5 мөл. солкуобай көрүлүннэ. 2025 сылга 70 эбийиэк, оттон 2026 сылга – өссө 38 эбийиэк үлэҕэ киириэҕэ.

2025 сылтан Ил Дархан Айсен Николаев сорудаҕынан, тыа хаһаайыстыбатын табаарын оҥорооччулары өйүүр судаарыстыбаннай боломуочуйалар, ол иһигэр кыра кыамталаах эбийиэктэри тутууга, муниципальнай оройуоннарга уонна куораттааҕы уокуруктарга бэрилиннилэр.