Бүлүү улууһун оҕолоро Бүтүн Арассыыйатааҕы «Горячее сердце» бэлиэнэн наҕараадаланнылар

Бүтүн Арассыыйатааҕы «Горячее сердце» уопсастыбаннай-судаарыстыбаннай көҕүлээһин,  2023 сыллааҕы лауреаттарга наҕараадалары туттартыаҕа. Бу наҕараадаҕа тиксибит дьон ортотугар Саха сирин икки үөрэнээччитэ – Копырин Афоня уонна Максимов Коля бааллар.

Былырыын, сэтинньи 16 күнүгэр, Бүлүү улууһун Уһун оскуолатын 4 кылааһын үөрэнээччилэрэ Копырин Афоня, Максимов Коля уонна Иванов Саша дьиэлээн испиттэр. Эмискэччи биир табаарыстара Саша охтон түспүт, тыына хаайтаран барбыт. Кини дьолугар доҕотторо уолуйан турбатахтар, бэрт суһаллык быһаарыныы ыла охсон, Коля көмө ыҥыра балыыһаҕа сүүрбүт. Афоня доҕорун түөһүн баттыалаан тыын киллэрэ сатаабыт. Уолаттар суһал түгэҥҥэ сөптөөх быһаарыыны ылбыттарын түмүгэр доруобуйа харыстабылын үлэһиттэрэ суһаллык кэлэ охсоннор, Сашаҕа кэмигэр мэдиссиинэ көмөтө оҥоһуллубут, олоҕо быыһаммыт.

Хорсун уолаттар ыам ыйын 17 күнүгэр Москваҕа чиэстээһиҥҥэ тиийиэхтэрэ, Кыайыы мусуойун Албан аат саалатыгар наҕараадаларын тутуохтара диэн cordis.fondsci.ru суруйар.