Бүлүүгэ аракыата тобохторун эвакуациялааһын салҕанар

От ыйын 30 күнүгэр 19:00 чааска Саха сиринээҕи Быыһыыр сулууспатын быыһааччылара Бүлүү улууһугар аракыата бааҕа көстүбүт сиригэр айаннаан барбыттара. Исписэлиистэр онно тиийэн 15 миэтэрэлээх бааҕы эрбээн, чаастарынан араарбыттар.

От ыйын 31 күнүгэр баах биир чааһа Бүлүүгэ эвакуацияланан, анал контейнерга угулунна.

«Уматык бааҕын хаалбыт чаастарын таһаарарга өссө хас да сырыы оҥоһуллуоҕа», — диэн эпэрээссийэни салайар, Саха сиринээҕи Быыһыыр сулууспатын Аэромобильнай этэрээтин начаалынньыгын солбуйааччыта Павел Алексеев иһитиннэрдэ.

Кини эбэн эппитинэн, бүгүн биэс быыһааччылаах бөлөх атын тобохтор көстүбүт сиригэр айанныахтара. Былаан быһыытынан, кинилэр бөртөлүөт түһэр былаһааккатын тэрийиэхтэрэ, онтон тобоҕу эрбээн таһыахтара. Үлэлэр өссө хас да күн салҕаныахтара.

Бэлиэтээн эттэххэ, эвакуциялааһын үлэтэ саҕаланыан иннинэ эколог-исписэлиистэр тулалыыр эйгэҕэ уонна нэһилиэнньэҕэ куттал суоһаабатын туһугар, аракыата тобохторо көстүбүт сирдэригэр радиация таһымын кээмэйдээбиттэрэ, буортан уонна ууттан боруоба ылбыттара.