Бүлүүгэ баарга дьахталлар эр киһиттэн сылтаан айдаарсыбыттар

Бүлүү оройуоннааҕы полициятыгар баарга дьахтары эчэппиттэрин туһунан иһитиннэрбиттэр. Бу туһунан СӨ ИДьМ пресс-сулууспата суруйар.

Суһал-ирдиир тэрээһиннэри ыытан, холуобунай ирдэбил үлэһиттэрэ уорбаланааччы дьахтары быһаарбыттар. Бу Сунтаартан сылдьар 37 саастаах дьахтар эбит.

Быһаарыллыбытынан, уорбаланааччы дьахтар баарга урут чугастык билсэ сылдьыбыт эр киһитин көрсүбүт. Эр киһи дьахтары кытта кэпсэтэ түһэн баран, билэр дьахтара үлэлиир баарынай стойкатыгар тиийбит. Урукку дьүөгэтэ киниэхэ эрий да эрий буолбутугар, эр киһи бу баарга үлэлиир дьахтарга төлөпүөнүн биэрбит. Онуоха бу быһыыны аннараа дьахтар сөбүлээбэтэх.

Сотору соҕус буолан баран дьахталлар таһырдьа көрсө түспүттэр, онно этиһии саҕаламмыт. Уорбаланааччы дьахтар күнүүлээбит санаатыгар, аннараа дьахтары саайан муннун эчэппит. Ол кэнниттэн быһылаан буолбут сириттэн барбыт, эмсэҕэлээбит дьахтар полицияны ыҥырбыт. Кэлин быһаарыллыбытынан, быһылаан төрүөтүнэн буолбут эр киһи айдаан кэмигэр суох эбит.

Холуобунай дьыала тэрилиннэ.