Бүлүүгэ балыыһа иккис куорпуһун тутуу саҕаланна

Бүгүн, атырдьах ыйын 10 күнүгэр, Бүлүү улууһун балыыһатын комплексын иккис түһүмэҕин тутуу саҕаланна. Тутуу үлэтэ «Доруобуйа харыстабыла» национальнай бырайыагынан ыытыллар.

Бу туһунан СӨ Бырабыыталыстыбатын пресс-сулууспата иһитиннэрэр. «Быйыл олунньуга биһиги манна, Бүлүүгэ, бөдөҥ балыыһа комплексын бастакы түһүмэҕин аспыппыт. Бүлүү улууһун олохтоохторугар эрэннэрбитим курдук, быйыл бу бөдөҥ тутуу иккис уочаратын тутууну саҕалааһыҥҥа киириэхпит. Саҥа оборудованиенан сэбилэммит уонна ирдэбилгэ эппиэттиир, аныгы тутуулаах комплекс 2025 с. толору кыаҕынан үлэлиэҕэ. Саҥа балыыһаҕа анал мэдиссиинэ көмөтүн Бүлүү оройуонун олохтоохторо эрэ буолбакка, ыаллыы сытар улуустартан – Үөһээ Бүлүүттэн уонна Кэбээйиттэн кэлэннэр эмиэ ылаллар. Тоҕо диэтэххэ, бу бөдөҥ эбийиэк оройоуннар икки ардыларынааҕы киин быһыытынан буолар», – диэн Айсен Николаев балыыһа иккис уочаратын тутуу үөрүүлээх түгэнигэр эттэ.

Бу балыыһа биир уратытынан, аан бастаан манна мэдиссиинэ реабилитационнай киинэ аһыллара буолуо диэн Ил Дархан бэлиэтээн эттэ. Мэдиссиинэ саҥа комплексыгар МРТ салаатыгар ураты магнитнай-резонанснай томограф туруоруллуо.

«Бүгүн өрөспүүбүлүкэҕэ нэһилиэнньэ доруорбуйатыгар улахан болҕомто ууруллар», – диэтэ Бүлүү улууһун баһылыга Сергей Винокуров уонна олохтоохтор ааттарыттан өрөспүүбүлүкэ салалтатыгар, Ил Дархан Айсен Николаевка Саха сирин нэһилиэнньэтин доруобуйатыгар кыһаллалларын уонна доруоубйа харыстабылын саҥа эбийиэктэрин туттаралларын иһин улаханеык махтанарын биллэрдэ.

Бүлүү улууһун олохтоохторо саҥа балыыһа тутуллан үлэҕэ киирэрин 30 сыл кэтэспиттэрэ. Өссө ааспыт үйэ 90-с сылларыттан Бүлүүтээҕи киин балыыһа саҥа дьиэтин тутууну туруорсубуттара. Билигин Судаарыстыбаннай Дуума дьокутаата, уруккута өрөспүүбүлүкэ Бырабыыталыстыбатын бэрэссэдээтэлэ Галина Данчикова өйөбүлүнэн 2014 с. балыыһа бастакы сыбаайата түспүтэ. Ол гынан баран эбийиэк тутуута араас биричиинэнэн тохтоон хаалбыта.

Айсен Николаев 2018 с. Бүлүү улууһугар сылдьан улуус салалтатын кытары балыыһа тутуутун хайысхаларын дьүүллэспиттэрэ уонна доруобуйа харыстабылын саҥардан тутуу бастакы сүһүөҕүн бырагырааматынан тутар туһунан быһаарыллыбыта.

Бүлүүтээҕи киин балыыһа кылаабынай бырааһа Егор Григорьев этэринэн, балыыһа бастакы түһүмэҕэ киириэҕиттэн, хирургическай эпэрээссийэни оҥоруу көрүҥэ кэҥээбит.
«Лапароскопическай эпэрээссийэ кэриҥэ улааппыт. Бэс ыйыттан гинекологическай лапароскопическай эпэрээссийэлэр оҥоһуллуллар. Хирург быраастар Новосибирскай куоракка идэлэрин үрдэтинэн эбии «Эндопротезирование тазобедренного сустава» бырагырааманан үөрэнэн кэллилэр. Атырдьах ыйын бүтүүтэ эндопротезированияҕа бастакы эпэрээссийэ оҥоһуллара былааннар. Бу эпэрээссийэлэр үрдүк технологиялаах эпэрээссийэлэргэ киирсэллэр», — диэн кылаабынай быраас эттэ.