Бүлүүгэ эдэр кыыс көҥүлэ суох сахалыы киинэлэри атыылаан тутуллубут

 Бүлүү улууһун  суута 20 саастаах Бүлүү олохтооҕун РФ ХК 146-с ыстатыйатын 3-с чааһын «в» пуунунан (ааптар быраабын эбийиэктэрин сокуоннайа суохтук туһаныы, улахан кээмэйинэн эргинии) буруйдааҕынан билиннэ. Бу туһунан Саха сиринээҕи Холбоһуктаах сууттарын пресс-сулууспата иһитиннэрэр.

Силиэстийэҕэ быһаарыллыбытынан, 2023 сыл алтынньытыттан бу сыл кулун тутар ыйыгар диэри кыыс биир мессенджергэ «Киинэлэр» диэн ааттаах ханаалыгар ааптар көҥүлэ уонна сокуоннай төрүөтэ суох 17 сахалыы киинэни аһаҕастык атыыга таһаарбыт. Ханаалы оҥоруу сүрүн сыалынан-соругунан аудиторияны кэҥэтии уонна сурутааччы ахсаанын элбэтии буолбут.

Бу сыл кулун тутар ыйга кыыс үп-харчы өттүнэн ыарахаттары көрсөн, ханаалын 20 000 солк. суумаҕа атыылаабыт. Кини сокуону кэһэр дьайыыларын түмүгэр, ааптар быраабынан көмүскэллээх эбийиэктэри сокуоннайа суох туһаныыттан холбоон 40 146 383 солк. тэҥнэһэр ночооттоммут — бу улахан хоромньунан ааҕыллар.

Холуобунай дьыала көрүллүүтүн кэмигэр кыыс буруйун толору билиммит уонна  кэмсинэрин биллэрбит. Суут  дьахтар буруйун билиммитин, кэмсиммитин, үчүгэй өттүттэн характеристикалааҕын уонна урут сууттана сылдьыбатаҕын учуоттаан, 1 сыл усулуобунайдык көҥүлүн быһарга уураахтаата. Итини таһынан, суут буруйу оҥорорго туһаныллыбыт iPhone 15 Pro суотабай төлөпүөнүн судаарыстыба дохуотугар былдьаата. Бириигэбэр сокуоннай күүһүгэр киирэ илик.