Бүлүүгэ оҕолор куйуурдаатылар

Бүлүү улууһун Аҕалар түмсүүлэрин сэбиэтин көҕүлээһининэн, тулаайах хаалбыт, төрөппүт көрүүтэ-истиитэ суох сылдьар оҕолорго  «Аҕа үөрэҕэ» бырайыак чэрчитинэн үгүс тэрээһин ыытыллар.

Степан Аржаков аатынан Бүлүүтээҕи дьиэ кэргэҥҥэ иитиини өйүүр киин дириэктэрин солбуйааччы Юрий Иванович Тутукаров Аҕалар түмсүүлэрин сэбиэтин бэрэссэдээтэлэ буолар. Уол оҕону иитиигэ үгүс үлэни ыытар хамсааһыҥҥа көхтөөхтүк кыттар.

Юрий Иванович уол оҕону булка-алка сыһыаран иитии оҕо кыра сааһыттан саҕаланыахтаах диэн санааны тутуһар. Маны сэргэ, сааскы сынньалаҥ кэмигэр оҕолору илдьэ муус аннынан балыктааһын ньыматыгар уонна куйуурга үөрэппиттэр. Сэргэх тэрээһиҥҥэ оҕолор айылҕалыын алтыһан, дьиҥ саха эр киһитэ туттар булт ньымаларын кытта билсэн төһөлөөх астыммыттара буолуой?

Бу туһунан   Юрий Тутукаров санаатын үллэһиннэ:

«Аҕа үөрэҕэ» бырайыакпыт үс түһүмэхтэн турар. Ол күһүҥҥү, сааскы кэмнэргэ туһуланар. Оҕолор оскуолаҕа үөрэнэр буоланнар, үөрэх сынньалаҥын кэмигэр эрэ табыллар. Бу биһиэхэ сааскы түһүмэхпит ыытылынна. Оҕолорго куйуур, муус аннынан балыктааһын үгэстэрин билиһиннэрдибит.