Бүлүүгэ оҕолор вездеходунан остуолбаҕа тиийэн түспүттэр

Бүлүү улууһугар түөрт оҕо вездеходунан айанаан иһэн остуолбаҕа тиийэн түспүттэр. «Сокол» снегоболотоходу 11 саастаах уол ыытан испит, саамай кыра пассажир 4 саастаах диэн Саха сиринээҕи ГАИ иһитиннэрэр.

Саахал балаҕан ыйын 8 күнүгэр 21:15 чааска Лөкөчөөн нэһилиэгэр дьаһалта таһыгар буолбут. 11 саастаах суоппар вездеходу сатаан салайбакка, уот остуолбатыгар саайыллыбыт.

Саахалга суоппар оҕо бэйэтин кытта үс пассажира эчэйбит — 10, 7 уонна 4 саастаах оҕолор.

Тырааныспардара судаарыстыбаннай регистрационнай бэлиэтэ суох эбит.

Оҕоҕо тырааныспары биэрбит сокуоннай бэрэстэбиитэл 30 тыһ.солк. ыстарааптаммыт.