Бүлүүгэ айылҕа гааһын уорбут олохтоох киһи буруйданна

Бүлүү оройуонун суутун бириигэбэринэн олохтоох киһи буруйдааҕынан ааҕылынна.

Ол курдук, 39 саастаах Бөтүҥ олохтооҕо 2024 сыл алтынньы ыйыгар намыһах баттааһыннаах гаас турбатын эрбээбит, ол кэнниттэн 2024 с. алтынньы 16 күнүттэн 2025 сыл тохсунньу 21 күнүгэр диэри айылҕа гааһын сокуоннайа суох туһаммыт. Эр киһи гаас турбатын гарааска турар оһоҕор бэйэтэ билэринэн холбоммут. Ону таһынан бу ыйыллыбыт гаас оборудованиета ирдэбилгэ эппиэттээбэтэ биллибит.

Сокуоннайа суох быһа холбонууну полиция үлэһиттэрэ учаастагы кэрийэ сылдьан булбуттар. Түөрт ый иһигэр эр киһи 27214,61 м3 айылҕа гааһын уоран туттубут уонна «Сахатранснефтегаз» АУо 150288 солк. суумаҕа хоромньу таһаарбыт. Эр киһи буруйун билиммит уонна хоромньуну толору төлөөбүт. Суут быһаарыытынан эр киһи 100 000 солк. ыстарааптанна. Бу туһунан СӨ сууттарын холбоһуктаах пресс-сулууспата иһитиннэрэр.