Бүлүүгэ суол саахалыгар алта киһи эчэйдэ

«Бүлүү» айан суолугар суол саахала буолла. Бу түмүгэр алта киһи араас эчэйиини ылан балыыһаҕа киирдэ диэн бүгүн, тохсунньу 17 күнүгэр, СӨ Борокуратуурата иһитиннэрдэ.

Ол курдук, «Бүлүү» федеральнай айан суолун 397-с км «Тойота-Ипсум» уонна «УАЗ-Профи» мааркалаах массыыналар харсыстылар. 33 саастаах минивэн суоппара кини иннитигэр айаннаан иһэр массыынаны ситэн ааһаары утары суолга тахсыбыт. Суоппар уонна кинини кытары айаннаан испит биэс киһи араас эчэйиини ылан балыыһаҕа киирбиттэр.

Ону таһынан, ааспыт сууккаҕа суол саахала Горнайга уонна Ньурбаҕа буолбут, онно үс киһи эчэйбит. Итиэннэ биир итирик туруктаах суоппар тутулунна.