Бүлүүгэ түмсүүлэр түмүстүлэр

Бу күннэргэ Бүлүү улууһугар өрөгөйдөөх күн буолан ааста. Ол курдук Бүлүү куоратын бочуоттаах олохтооҕо, улууспут уопсастыбаннай түмсүүлэрин уонна байыастарга көмөнү оҥорор пуун салайааччыта Мария Петровна Томская түмпүт түмсүүлэрин 2024 сыллааҕы үлэлэрин түмүктүүр үөрүүлээх тэрээһинэ буолла.

Бу күн түбүктэриттэн тэйэн, тэрээһин үөрүүлээх арыллыытын көрө, аралдьыйа ыраах нэһилиэктэртэн биир санааҕа сылдьар дьоммут-сэргэбит, барыта 22 түмсүү, 200-тэн тахса киһи түмүстэ.

Биһиги кытыы сытар Кыргыдай нэһилиэгиттэн «Дайыы» түмсүүбүтүнэн тиийдибит. Тэрээһин арыллыытыгар саха сиэрин-туомун тутуһан Дьөккөн Сөдүөтэ аал уоту күөдьүтэн, иччилэртэн көрдөһөн, айыылартан ааттаһан арыылаах алаадьынан маанылаан, дьөһөгөй доҕорбут сиэлинэн сыт таһааран, кымыһынан айах тутан алҕаата. Ити кэнниттэн эдэркээн саха эр бэрдэ, Уол Сомоҕо оһуохай тардан доллоһутта. Кэнниттэн саха саарына Айдаман олорсон эймэһиттэ. Дьэ, оһуобай үчүгэй оһуохайы оройуттан туттубут.

Түмсүүлэр үлэлэрэ билиҥҥи балаһыанньаҕа олоҕуран, сүрүннээн Ийэ дойдуларын көмүскүү барар биир дойдулаах буойуттарбытыгар көмө оҥоруута буолар. Ол чэрчитинэн «Бары бииргэ» девиһи тутуһан халыҥ, чараас көстүүмнэри, сэлиэччиктэри, кууркалары, балаклавалары, бэргэһэлэри тигэн, футболка, саа хаата бэлэмнээн, сиэлтэн харысхаллары, угунньалары, чүмэчилэри, харыстыыр, хаххалыыр сиэккэлэри, уо.д.а. оҥорон, уоппускаҕа кэлэ сылдьар уолаттарбыт төннөллөрүгэр наадалаах таҥастарын кэтэрдэн, таҥыннаран, биэрэн ыытарга кыһаллабыт.

Тэрээһиҥҥэ элбэҕи сэргии, сэҥээрэ, сөҕө көрдүбүт. Ол курдук, бэлэмнээбит, тикпит  таҥастарын, көбүөрдэрин, госпиталларга сытар уолаттарга анал сыттыктарын, кээнчэлэрин  уолаттарга туттаран, кэтэрдэн быыстапка курдук оҥорон көрдөрдүлэр. Дьэ, сатыыр сатыыр да буолаллар эбит диэн сөхтөрдүлэр. Түгэнинэн туһанан бэлиэтээтэххэ, Тылгыны олохтооҕо Иван Владимирович Иванов байыаннай дьайыыга сылдьар уолаттарга анал көстүүмнэри, футболкалары тигэн ыытарын истэн олус сөхтүбүт. Маныаха кини эр киһи буолан, ордук хайдах тиктэххэ, оҥордоххо табыгастааҕын билэн, ыпсаран тигэрин сөхтүбүт.

Бу тэрээһиҥҥэ сылдьан элбэҕи билэн-көрөн, астынан тураммыт, түмсүүбүт салайааччыта  Мария Петровна Томская хас биирдии түмсүүнү сатабыллаахтык салайара, ыкса үлэлэһэрэ бу тэрээһиҥҥэ ырылхайдык көһүннэ диэн бэлиэтиэхпитин баҕарабыт. Ытыктабыллаах киһибитигэр доруобуйаны баҕарабыт.

Ханна да көрдөххө, аахтахха, иһиттэххэ, байыастарга Саха сириттэн улахан көмө тиийэрэ бэлиэтэнэр. Маныаха уолаттарбыт маннык тэринэн үлэлиир түмсүүлэргэ, ыстааптарга, нэһилиэктэргэ махтаналлар. «Сахабыт сиринэн киэн туттабыт», — дэһэллэр.

Манна даҕатан эттэхпинэ, биһиги нэһилиэкпит 2024 сылга бэйэбит кылааппытын киллэрсэн турабыт. Байыастарга анаан оҥоһуллубут чүмэчилэри, хаххалыыр сиэккэлэри, сайыҥҥы көстүүмнэри, сиэлтэн оҥоһуктары, ыраастыыр оттоох харысхаллары, угунньулары Кыргыдай нэһилиэгин аатыттан туттарбыппыт.

Онтон ааспыт сыллааҕы үлэни-хамнаһы отчуоттуур, быйылгы былааны торумнуур тэрээһиҥҥэ бары түмсүүлэр сыралаах үлэлэрин сыаналаан улууспут баһылыга Сергей Николаевич Винокуров, нэһилиэкпит салайааччылара, дьокутааттара наҕараадалары, махтал суруктары, анал ааттары, волонтер дастабырыанньаларын дохсун ытыс тыаһыгар арыаллатан туттардылар.

«Сыл бастыҥ түмсүүтэ-2024» анал ааты «Күбэйэ» түмсүү (Тааһаҕар) ылла. 20000 тыһыынча солкуобайынан наҕараадаланна. Бука бары эҕэрдэбитин туттулар.

Норуот күүһэ — көмүөл күүһэ. Өрүү да буоларын курдук, бары биир сомоҕо буолан көмөлөсүһэн, өйөһөн кэллэхпит. Иннибит диэки эрэллээхтик хардыылаан, суолбут тэлэллэн, эйэлээх олох, өйдөһүү, өйөһүү куруутун баар буоларыгар баҕарабыт. Байыастарбыт тапталлаах Сахабыт сиригэр этэҥҥэ эргиллэн кэлэллэрин күүтэбит.

Елизавета Наумова,

«Дайыы» түмсүү салайааччыта,

Кыргыдай, Бүлүү.

Ааптар хаартыскалара.