Бүлүүгэ уол оҕо маҕаһыыны алдьатан киирэн, 10 тыһ. солк. суумалаах табаары уорбут

Бүлүү улууһун полициятын дьуһуурунай чааһыгар урбаанньыт сайабылыанньа суруйбут. Эр киһи быһаарбытынан, биллибэт дьон кини маҕаһыыныгар киирэн, 10 тыһыынча солкуобайтан тахса суумалаах табаары уоран илдьэ барбыттар. Бу туһунан  Саха сиринээҕи ИДьМ пресс-сулууспата иһитиннэрэр.

Быһылаан тахсыбыт сиригэр тиийбит үлэһиттэр аан алдьаммытын булбуттар. Маҕаһыынтан чипсы, минньигэс астар уонна гаастаах утахтар сүппүттэр. Бу дааннайдарга олоҕуран, оперативниктар табаары уорууга сааһын ситэ илик оҕо сыһыаннаах буолуон сөп диэн сабаҕалаабыттар.

Кэлин буруйу 14 саастаах оскуола үөрэнээччитэ оҥорбута быһаарыллыбыт. Кини саастарын ситэ илик оҕолор дьыалаларыгар полицияҕа учуокка турбатаҕа биллибит. Маҕаһыыҥҥа видеокамера суоҕун билэр буолан, уол оҕо ааны тимиринэн алдьатан киирэн, араас табаардары уорбут. Ол кэннэ уоруллубут малы ойуурга  быраҕыллыбыт массыына иһигэр кистээбит, ону полиция үлэһиттэрэ булан ылбыттар. Уоруу чахчытынан «Уоруу» ыстатыйанан холуобунай дьыала тэрилиннэ.