Бүлүүгэ Василий Афанасьев сырдык кэриэһигэр буулдьалаах саанан ытыы күрэҕэ буолла

Бу күннэргэ Бүлүү улууһун 2-с Күүлэт нэһилиэгэр биир дойдулаахтара, байыаннай дьайыы кыттыылааҕа Василий Афанасьев сырдык кэриэһигэр киэҥ хабааннаах буулдьалаах саанан ытыы күрэҕэ буолан ааста.

Тэрээһиҥҥэ Бүлүү улууһун баһылыгын солбуйааччы Александр Прокопьев, улуустааҕы дьаһалта сиргэ уонна баайга дуолга сыһыаннаһыыларын кэмитиэт салайааччыта Зоя Атласова, «Росгвардия» майора, байыаннай дьайыылар бэтэрээннэрин улуустааҕы Сэбиэтин бэрэссэдээтэлэ Афанасий Константинов, анал байыаннай дьайыы кыттыылааҕа, бэтэрээн Октябрина Афанасьева кыттыыны ыллылар.  Ону таһынан Үгүлээт нэһилиэктэн Василий Афанасьев аймахтара, бииргэ үлэлээбит үөлээннээхтэрэ, доҕотторо, биир дойдулаахтара сырыттылар.

Н.А. Алексеев аатын сүгэр оскуола иһинэн бастыҥ үөрэххэ көрдөрүүлээх кылааска көһө сылдьар «Дьоруой паартата» аһылынна. Ити кэннэ буулдьанан ытыыга кустовой күрэх буолла. Күрэххэ 1 Күүлэт, Тылгыны, Үгүлээт, 2-с Күүлэт 7-лии киһилээх хамаандалара кыттыыны ыллылар.

Күрэх түмүгүнэн кыайыылааҕынан Үгүлээт хамаандата, 2-с миэстэ – 2-с Күүлэт , 3-миэстэ – Тылгыны  нэһилиэктэр хамаандалара буоллулар. Итини таһынан Василий Афанасьев аймахтара анал номинациялары уонна сэмэй бэлэхтэри туттардылар:
«Кыра саастаах ытааччы» — Лущевская Ванесса;
«Аҕа саастаах ытааччы» — Тутукаров А.
«Бастыҥ бэтэрээн ытааччы» — Алексеева Т.
«Кэскиллээх ытааччы» — Дмитриев Саша;
«35-тэн аллараа саастаах ытааччы» – Спиридонова Н.
«Бастыҥ эр киһи ытааччы» — Прокопьев С.
«Бастыҥ кыыс ытааччы» — Колтовская Майя.
«Бастыҥ снайпер ытааччы» — Николаев А.
 Тэрээһин анал байыаннай дьайыы туһунан Бүлүү олохтоохторугар атын көрүүнү, өйдөбүлү хаалларыаҕа, үүнэр кэнчээри ыччакка патриотическай иитиигэ биир хардыынан буолар.

Наталья Слепцова, 2-с Күүлэт нэһилиэгин баһылыгын солбуйааччы