Бүлүүгэ «Ыллыыр кумах» диэн сынньанар сир арылынна

Бүлүү куоратын өрөгөйдөөх күнүн көрсө «Ыллыыр кумах» диэн дьон-сэргэ сөбүлээн сынньанар, толору тоҕуоруһар сирэ арылынна. Бу – киһи уонна айылҕа хардарыта дьүөрэлэһиилэрин түмүгэр үөскээн, айыллан тахсыбыт ураты кэрэ сир. Өрүскэ тахсыы аныгы архитектура ньымаларынан сиэрэ ситэрилиннэ.

2023 сыллаахха Бүлүү куоратын дьаһалтата GRADO архитектурнай бюроны кытта куораты тупсаҕай оҥорууга анаммыт бүтүн Арассыыйатааҕы бастыҥ бырайыактар куонкурустарыгар кыттыбыта уонна кыайыы көтөллөммүтэ. Бу куонкурус Уһук Илин федеральнай уокуругар ыытыллыбытын эбэн этиэххэ сөп. Кыайыылаахха биэрбит граннарын суумата 150 мөл.солк. Тупсаран оҥоруу кэмигэр улуус дьаһалтата үбүлээһин 75% уйуммута.

Бөҕөргөтүллүбүт биэрэги оҥоруу чэрчитинэн куорат 17953 м2 иэннээх сирэ тупсарылынна, дьон-сэргэ, оҕо аймах сынньанарыгар табыгастаах гына оҥоһулунна. Успуорт былаһаакката, кэнсиэрдиир сыана, кафе, Бүлүү өрүһүн көрөргө анаммыт сир, сатыы сылдьар муоста курдук тутуулар баар буоллулар. Арааһынай моһуоннаах арт-эбийиэктэр дьон болҕомтотун тардаллар – киирэр аартык, «Таҥара дьиэтэ» модульнай конструкция, хатыыска пааматынньык, оҥочо курдук оҥоһуулаах хачыал, өрүскэ киирэр эриэккэс кирилиэс. Архитектордар Бүлүү олохтоохторун этиилэрин ылынан, Бүлүү өрүһүн кытта ыкса ситимнээх былыргы куорат тыынын хааллардылар. Ону бөҕөргөтүллүбүт биэрэк «Ыллыыр кумах» диэн аата да туоһулуур курдук. Бүлүү өрүс кытылынан киһи хаамтаҕына, кырылас кумах тыаһа бу аакка иһиллэр. Бу — айылҕа ураты-мааны дьиктитэ, Бүлүү биһирэмнээх бэлиэтэ.

Маны таһынан куорат күнүгэр Бүлүү олохтоохторо өссө икки бэртээхэй эбийиэги бэлэх туттулар. Ол курдук “Былыргы куораты тупсаран оҥоруу” бырайыак уонна Бүлүү куоратын эргиир суола арылыннылар. “Былыргы куораты тупсаран оҥоруу” бырайыак үбүлээһинигэр “Табыгастаах куорат эйгэтин оҥоруу” СӨ бырагырааматын быһыытынан 21 мөл.солк. көрүлүннэ. Онтон Бүлүү куоратын эргиир суолун тутуутун бырайыага СӨ Суолун пуондатын олохтоох бүддьүөттэргэ субсидияны анааһын куонкурсугар кыайан, 108мөл.солк. үбүлэнэн, быйыл олоххо киирэр кыахтанна.  

Биллэн турар, тутуу дьон олорор усулуобуйата тупсарыгар улахан хардыы. Ону аһара баран Бүлүү айылҕатын уонна култууратын биир хатыламмат уратыта. Бу барыта куораппытынан киэн туттарбытыгар, ыччаппыт олохсуйа хааларыгар, туристар сэргии-сэҥээрэ ыалдьыттыы кэлэллэригэр улахан төһүү.