Бүлүүлэр байыаннай дьайыы зонатыгар гуманитарнай көмөнү тиксэрдилэр

Бүлүү улууһуттан үс нэһилиэк баһылыктара уонна дьаһалта исписэлииһэ байыаннай дьайыы ыытыллар сиригэр тиийэн, байыастарга гуманитарнай көмөнү уонна дойдуларыттан ыытыллыбыт баһыылкалары тириэрдэ сылдьаллар. Бу туһунан улуус дьаһалтатын пресс-сулууспата иһитиннэрэр.

Дэлэгээссийэ састаабыгар Бүлүү куоратын баһылыга Ян Попов, Кыһыл Сыыр баһылыга Юрий Гвызин, Чинэкэ нэһилиэгин баһылыга Антон Амбросьев уонна улуустааҕы Биир кэлим диспетчерскэй сулууспа (ЕДДС) начаалынньыга Николай Иванов бааллар.

Кинилэр айаннарын бастаан Москва куораттан саҕалаан, байыастар сайаапкаларынан ирдэнэр тэриллэри атыыласпыттар. Билигин дэлэгээссийэ икки бөлөххө арахсан, иккис күннэрин Запорожье уонна Донецкай хайысхаларынан үлэлии сылдьар. Кинилэр байыастарга чугас дьонноруттан, нэһилиэктэртэн уонна тэрилтэлэртэн хомуллан ыытыллыбыт баһыылкалары, ону тэҥэ дроннары, генератордары, тепловизионнай прицеллары, матасыыкыллары уонна да атын наадалаах маллары тиксэрэллэр.

«Уолаттарбыт ордук дойдуларыттан тиийбит иҥэмтэлээх аһы, сибиэһэй убаһа, ынах этин, балыгы тутан үөрдүлэр, барҕа махталларын тиэрдэллэр», — диэн Бүлүү куоратын баһылыга Ян Попов бэлиэтиир.

Дэлэгээссийэ чилиэннэрэ этэллэринэн, төрөөбүт дойдуларыттан ыраах, инники кирбиигэ сылдьар саллааттарга дойдуларын дьоно бэйэлэрэ тиийэн көрсөллөрө, сонуну кэпсэтэллэрэ санааларын күүһүрдэр, кынаттыыр.

«Улууспут олохтоохторун, хас биирдии киһини Кыайыы туһугар, уолаттарбыт санааларын бөҕөргөтөргө өссө күүскэ түмсэн үлэлиэххэ, биир сомоҕо буолуохха диэн ыҥырабыт! Уолаттарбыт дойдуларыгар эрчимнээх, кыайыылаах эргиллэллэригэр баҕарабыт. Дэлэгээссийэбит сырыыта ситиһиилээх буоллун!» — диэн пресс-сулууспа суруйар.