Бүлүүлэр “Сокровище Севера-2025” ситиһиилээхтик кытыннылар

Соторутааҕыта Москва куоракка норуоттар икки ардыларынааҕы “Сокровище Севера-2025” быыстапката буолан ааста. “Сокровище Севера” быыстапка быйыл 20 сыллаах үбүлүөйүн бэлиэтээтэ.

Быйыл улахан тэрээһиҥҥэ Арассыыйа 20 эрэгийиэнин бэрэстэбиитэллэрэ Хоту, Сибиир уонна Уһук Илин төрүт олохтоохторун баай култуурунай нэһилиэстибэлэрин билиһиннэрдилэр. Быыстапкаҕа 500-тэн тахса маастар кытынна, ыалдьыт уопсай ахсаана 7 тыһыынчаны куоһарда. Кыттааччылар истэригэр Саха сириттэн эмиэ элбэх норуот маастара кытынна. Быыстапкаҕа Бүлүү улууһуттан норуот маастара, Арассыыйа ойуулуур-дьүһүннүүр искусствотын Худуоһунньуктарын сойууһун чилиэнэ Ирина Зиновьевна Афанасьева тиийэн кытынна.

Кини Бүлүү улууһуттан соҕотоҕун, улуус маастардарын оҥоһуктарын илдьэн көрдөрдө. Быыстапкаҕа 5 көрүҥҥэ улуус 8 маастарын үлэтэ киэҥ көрүүгэ турда.  Саха сирин уонна Бүлүү улууһун маастардара  Семен Томскай, Степан Осипов, Николай Шамаев, Светлана Петрова, Феодосия Григорьева,  Ирина Афанасьева, Сусанна Семенова, Син Хой Светлана араас матырыйааллартан оҥоһуллубут оҥоһуктара турдулар.

Бүлүү улууһун маастардар үлэлэрэ үбүлүөйдээх быыстапкаҕа ситиһиилээхтик кыттан, бары дипломант уонна лауреат аатын ыллылар.