«Бүлүү» суолга үс киһи эчэйиилээх массыына саахала буолла

Бүгүн сарсыарда «Бүлүү» федеральнай суол 764-с килэмиэтиригэр дьон эчэйиилээх массыына саахала буолла диэн СӨ Быыһыыр сулууспата иһитиннэрэр. 

Саахала Ньурба улууһун Чаппанда уонна Дьаархаан икки ардыгар буолбут. Барыллаан дааннайдарынан, Хайс (Миллионник) суоппара сатаан салайбакка суолтан туораан, маска саайыллыбыт.

Массыына иһигэр хас даҕаны киһи олорсон айаннаан испит, ол иһигэр икки оҕо баар. Саахал түмүгэр икки эр киһи уонна дьахтар эчэйбиттэр.

Быһылаан буолбут сиригэр Ньурбатааҕы көрдүүр-быыһыыр этэрээт суһал бөлөҕө тиийбит. Быыһааччылар араас эчэйиини ылбыт, уҥуохтарын тоһуппут дьону массыынаттан таһааран суһал көмө биригээдэтигэр тиксэрдилэр.