Бүлүүтээҕи ойуур хаһаайыстыбата: Дендропааркабытын харыстааҥ!

«Зеленый четверг» айылҕа харыстабылын аахсыйатын чэрчитинэн, Бүлүүтээҕи ойуур хаһаайыстыбата (Д.Г. Макаров аатынан «Зеленый пояс Вилюя» пуонда партнера) дендрарийга субуотунньук ыытта.

Лесник Михаил Кутугутов уонна ойуур хаһаайыстыбатын маастардара Хомустаах күөлүн кытылыгар «Кустар» дьоҕус архитектурнай тутууну уонна андаатар туһунан иһитиннэрэр истиэндэ-паннону туруордулар диэн СӨ Экология министиэристибэтин пресс-сулууспата иһитиннэрэр. Маны таһынан экология үлэһиттэрэ айылҕаны тупсарыыга тэрээһини ыыттылар – бөҕү-сыыһы хомуйдулар, тастылар уонна уу ситимин кэҥэттилэр.
Бэлиэтээн эттэххэ, уу ситимин, кырааннары, турбалары, о.д.а. пуонданы төрүттээччи К.Г. Поскачина бэйэтин үбүгэр ылбыт. Оттон туһаныллыбыт тиэхиньикэни Экология министиэристибэтин «Якутлесресурс» тэрилтэтэ хааччыйбыт.