Ууттан оҕону быыһаабыт бырааһы наҕараадалаатылар

Хаҥалас улууһун киин балыыһатын дерматовенеролог-бырааһа Тамара Анканны ууга түспүт оҕону быыһаабытынан СӨ Доруобуйаҕа харыстабылын министиэристибэтин Махтал суругунан наҕараадаланна.

Кини кэллиэгэтин кытта Өлүөнэ эбэ кытылыгар сынньана сылдьан, приступтаабыт 11 саастаах кыыска көмөҕө түспүттэр. Наҕарааданы СӨ Доруобуйа харыстабылын миниистирэ Лена Афанасьева туттарда.

Быһылаан от ыйын 21 күнүгэр киэһэ буолбут. Пляжка кыыс соһуччу куһаҕан буолан, өйүн сүтэрэн ууга охтубут. Бу кэмҥэ чугас Хаҥалас миэдиктэрэ Тамара Анканны уонна Наталья Емельянова баар буолан хаалбыттар.

«Олус куйаас күн этэ. Биһиги сөтүөлүү, кытылга сынньана сылдьан көмөҕө ыҥырар хаһыыны истибиппит. Оҕоҕо эпилепсия пристуба буолбут этэ. Оҕону тыынар бэлиэтэ суох ууттан таһаарбыттара. Биһиги тутатына сүрэх-тыҥа реанимациятын оҥорон барбыппыт. Кыыс олоҕун быыһыыр кыаллыбат курдуга. Оҕо сыҥааҕа күүскэ ытырыллыбыт этэ, сотору буолаат тыынан барбыта. Биир чаас ааспытын курдуга да, бу барыта биэс мүнүүтэ иһигэр буолбута. Кытылга сылдьар эдэр киһи оҕону суһал көмө биригээдэтигэр туттарарга көмөлөспүтэ. Куйаас күн уонна тымныы уу кини туруга мөлтүүрүгэр оруолу оонньоотулар», — диэн кэпсээтэ Тамара Анканны.

Билигин 11 саастаах кыыс туруга үчүгэй — балыыһаттан таһаарбыттар. Оҕо ийэтэ соторутааҕыта быраастары кытта көрсөн, кыыһын быыһаабыттарын иһин махтаммыт.

«Олус истиҥ көрсүһүү буолла, биһиги кыыспыт эдэр төрөппүттэрдээх элбэх оҕолоох ыалга иитиллэр. Билигин оҕо туруга үчүгэй. Мин миниистиртэн Махтал сурук туппуппуттан олус үөрдүм, көмөбүтүн сыаналаабыттара кэрэхсэбиллээх. Биһиги оннубутугар маннык түгэҥҥэ ким баҕарар көмөлөһүө этэ», — диэн Тамара Анканны эбэн эттэ.