Бырааһынньык кэмигэр баһаартан сэрэхтээх буолуохха

Бүгүн, ахсынньы 17 күнүгэр, Айсен Николаев ыксаллаах быһыыны сэрэтэр, туоратар уонна баһаартан куттал суох буолуутун хамыыһыйатын мунньаҕын салайан ыытта, онно тустаах тэрилтэлэр уонна муниципальнай тэриллиилэр салайааччылара кыттыыны ыллылар.

Күүстээх тымныылар саҕаланан, Саҥа дьыллааҕы бырааһынньык күннэрэ чугаһаан эрэллэринэн, техногеннай баһаардары сэрэтии күннээҕи сүрүн боппуруоһунан буолла.

Өрөспүүбүлүкэ баһылыга салайар тэрилтэлэр, олохтоох салайыныы уорганнара сэрэтэр миэрэлэри күүһүрдэллэрэ, ол иһигэр дьон олорор сирдэригэр рейдэлэри тэрийии наадатын бэлиэтээтэ. Кини миэстэтигэр баар балаһыанньаны дириҥник өйдөөһүн уонна кэмигэр дьаһаныы алдьархайдары сэрэтиигэ сүрүн суолталаахтарын тоһоҕолоото.

«Олохтоох былаас уорганнарын эппиэтинэһэ улахан суолталаах. Биһиги сэрэтэр үлэни күүһүрдүөхпүтүн наада, ол иһигэр кыаммат уонна элбэх оҕолоох ыаллары, улахан баһаар кутталын үөскэтэр дьиэлэри кэрийэн көрүөххэ наада. Олохтоох балаһыанньаны билэҕит. Бу үлэни күүһүрдүөххэ наада. Олохтоох салайыныы уорганнара тэрилтэлэр,  ол иһигэр социальнай эбийиэктэр икки ардыларыгар ситимнээхтик үлэлиэхтээхтэр», — диэн Айсен Николаев мунньах кыттыылаахтарыгар тыл эттэ.

2025 сылга Саха сиригэр 1742 баһаар буолбут, ол былырыҥҥытааҕар 2,8%-нан аҕыйах. Баһаардар түмүктэринэн, 57 киһи өлбүт, 72 киһи эмсэҕэлээбит. Бары баһаардартан аҥаардарын кэриҥэ олорор дьиэлэргэ тахсыбыт, үксүлэрэ уоту сэрэхтээхтик туттубаттан, алдьаммыт электрическэй тэриллэртэн уонна оһох сылытар систиэмэлэриттэн тахсыбыттар.

Ону тэҥэ, дьиэ-уот, хомунаалынай хаһаайыстыба уонна энэргиэтикэ салаатыгар үлэни тэрийии, ол иһигэр хочуолунайдарга уматык  саппааһын хааччыллыыта эмиэ туспа дьүүллэһилиннэ. Айсен Николаев тустаах сулууспалар болҕомтолорун улахан тымныы түһэр кэмигэр сылааһынан уонна уунан хааччыйыыга ханнык да хааччахтааһын сөбө суоҕун, үөскүүр ыксаллаах быһыы-майгы төһө кыалларынан түргэнник быһаарыллыахтааҕын туһунан эттэ.

«Бу күннэргэ, күнүстэри-түүннэри үлэлиэххэ уонна төһө кыалларынан иэһи аҕыйатыахха наада. Бу боппуруоһу ураты болҕомтоҕо ылабын. Бырааһынньык кэмигэр, Саҥа дьыл уонна Ороһуоспа бырааһынньыктарыгар кыһалҕа үөскээбэтин туһугар, уматыгынан хааччыйааччылар уонна тиэйээччилэр бары тохтоло суох үлэлиэхтээхтэр», — диэтэ кини.

Өрөспүүбүлүкэ баһылыга Ыксаллаах быһыы-майгы министиэристибэтин, Ис дьыала министиэристибэтин, доруобуйа харыстабылын тэрилтэлэрин Саҥа дьыл иннинээҕи уонна бырааһынньыктааҕы кэмҥэ үлэлэрин күүһүрдэргэ ыҥырда. Күүстээх тымныы уонна кутталлаах усулуобуйаҕа бары сулууспалар сэрэтэр миэрэлэргэ көхтөөхтүк кыттыылара уонна киһи олоҕор, доруобуйатыгар ханнык баҕарар кутталга түргэнник эппиэттээһин ирдэнэр.