Бырааһынньыкка анаммыт арыгыны аймаҕыттан уорбут

ИДьМ Кэбээйи оройуоннааҕы отделын дьуһуурунай чааһыгар олохтоох киһи хоспоҕуттан 24 бытыылка арыгытын уордарбытын туһунан иһитиннэрбит. Холуобунай ирдэбил үлэһиттэрэ маныаха эмсэҕэлээччи 31 саастаах аймаҕа киһи уорбаланарын быһаарбыттар диэн СӨ ИДьМ пресс-сулууспата суруйар.

Быһаарыллыбытынан, уорбаланааччы аймаҕа бырааһынньыкка диэн арыгы атыылаһан, хоспоҕор уурбутун билэн, ону уорарга санаммыт. Хаһаайын тиэргэнигэр күрүөнү ыстанан ааһан, хоспох биир маһын тууран ылан киирбит. Онтон 24 бытыылка арыгыны уорбут уонна дьону кытта испиттэр.

Уоруунан холуобунай дьыала тэрилиннэ.