Бырааһынньыктарга уопсастыбаннай сирдэртэн араас кэһиилэри оҥорбут 191 киһини туттулар

Саҥа дьыллааҕы сынньалаҥ күннэригэр арыгыны атыылааһын уонна эргинии эйгэтигэр сокуону кэһиини тохтотор уонна сэрэтэр үлэ күүһүрдүллүбүт эрэсииминэн барда диэн Дьокуускай куорат мээрэ Евгений Григорьев телеграмм-ханаалыгар иһитиннэрдэ.

«Дьокуускайдааҕы» ИДьМ МУ полициятын үлэһиттэрэ 17 сокуону кэһии тахсыбытын быһаардылар, администартивнай боротокуолу оҥордулар уонна уопсайа 173 лиитэрэ арыгыны былдьаатылар. Уулуссалартан уонна уопсастыбаннай сирдэртэн араас кэһиилэри оҥорбут 191 киһини туттулар.

ГАИ үлэһиттэрэ 36 итирик туруктаах суоппары туттулар, кинилэртэн 5-һэ итирик сылдьан иккистээн тутуллубут.

Дьокуускай куорат дьаһалтатын Административнай хамыыһыйатынан «лже-кафелар», баардар, түүҥҥү кулууптар уонна атын арыгы атыылыыр пууннара СӨ Административнай кодексатын 6.25 ыстатыйатын кэспиттэринэн 3 боротокуол оҥоһулунна.

Бырааһынньык күннэригэр Административнай хамыыһыйа үлэһиттэрэ рейдэлэри ыыттылар. Арыгы атыылыыр 34 эбийиэк бэрэбиэркэлэннэ, онно 10 кэһии тахсыбыта быһаарыллан, боротокуоллар оҥоһулуннулар.